සිඩ්නි මහ මග මැද අපරාධකරුවෙක් ඝාතනය කරයි

සිඩ්නි Harold Street ප්‍රදේශයේ සිදු වූ වෙඩි තැබීමකින් පුද්ගලයෙකු ජීවිතක්ෂයට පත්වී තිබෙනවා.

Tarek Ayoub නම් පුද්ගලයෙකු මෙලෙස ඝාතනයට ලක්වී ඇති අතර ඔහු අද අලුයම 3.30ට පමණ Parramatta ප්‍රදේශයේ තවත් අයෙකු සමග ගමන් කරමින් සිටියදී වෙඩි ප්‍රහාරය එල්ලවී ඇති බවයි වාර්තා වන්නේ.

අලුයම 3.30 ට පමණ එල්ල වූ වෙඩි ප්‍රහාරයත් සමග හදිසි සේවා නිලධාරීන් එම ස්ථානයට පැමිණ මූලික ප්‍රතිකාර ලබාදුන්නා ද ඔහු එම ස්ථානයේදීම මිය ගොස් තිබෙනවා.

පොලිස් රහස් පරීක්ෂක ඩැනී ඩොහර්ටි සඳහන් කළේ මියගිය පුද්ගලයා විවිධ අපරාධ ජාලවලට සම්බන්ධකම් ඇති අයෙකු මෙන්ම පුද්ගල ඝාතන ඇතුළු ප්‍රචණ්ඩ අපරාධ පිළිබඳ විමර්ශනවලට සම්බන්ධ අයෙකු බවයි.

මෙම වෙඩි තැබීම අදාළ පුද්ගලයා ඉලක්ක කරගෙන සිදුවූ එකක් බැවින් මහජනතාවට අවදානමක් නොමැති බව පොලිසිය අවධාරණය කළා.

එමෙන්ම ඉදිරි දිනවලදී මෙවැනි ප්‍රහාර වැළක්වීමට විශේෂ මෙහෙයුමක් ආරම්භ කරන බවයි පොලිසිය කියාසිටියේ.

මේ අතර අද අලුයම 3.45 ට පමණ ග්‍රැන්විල්හි (Granville) ඇබෙකට් ස්ට්‍රීට් හි (A’beckett Street) තිබී ගිනි තැබූ මෝටර් රථයක් සොයා ගෙන ඇති අතර එය මීට පෙර සොරකම් කළ එකක් බවටයි වාර්තා වී ඇත්තේ.

කිසියම් පුද්ගලයන් දෙදෙනෙකු වෙනත් මෝටර් රථයකින් එම ප්‍රදේශයෙන් පිටත්ව යන ආකාරය ප්‍රදේශවාසීන් දැක ඇති අතර වෙඩි තැබීම සහ මෙම සිදුවීම අතර සම්බන්ධයක් ඇත්ද යන්න සම්බන්ධයෙන් පොලිසියේ අවධානය යොමුවී තිබෙනවා.