නිව් සවුත්වේල්ස් ප්රාන්තයේ “000” හදිසි ඇමතුම් සඳහා වීඩියෝ තාක්ෂණය හඳුන්වා දීම අද සිට ක්රියාත්මක කිරීමට රජය පියවර ගෙන තිබෙනවා.
තමන් මුහුණදී සිටින තත්වයේ බරපතලකම හදිසි ඇමතුම් අංශයට සජීවීවම දැක බලා ගැනීමට අවස්ථාව ලබාදීමට මෙමගින් ජනතාවට හැකි වනු ඇති.
දුරකථනයෙන් කතා කිරීමට නොහැකි තරම් හදිසි අනතුරුදායක අවස්ථාවන්හිදී GPS තාක්ෂණය මගින් සිදුවීමට අදාළ නිශ්චිත ස්ථාන, වීඩියෝ හෝ ඡායාරූප යැවීම මෙන්ම කෙටි පණිවුඩ යැවීමට ද ඇමතුම්කරුවන්ට මෙමඟින් හැකියාව ලැබෙන බව සඳහන්.
මෙම වැඩසටහනේ මාස 12ක අත්හදා බැලීමක්, තෝරාගත් අගනගර සහ ප්රදේශ තුළ 2023 වසරේ පෙබරවාරි මාසයේදී ක්රියාත්මක වූ අතර සිඩ්නි බොන්ඩායි ජන්ෂන් පිහි ඇනුම සම්බන්ධ පරීක්ෂණයේදී ද එම තාක්ෂණය සහාය වී තිබුණා.
එමෙන්ම අතුරුදන් වූවන් 100කට අධික සංඛ්යාවක් සහ කැලෑබද ප්රදේශවල සංචාරය කරන්නන් 60 දෙනෙකු සොයා ගැනීමට ද මෙම තාක්ෂණය උපකාරී වූ බවයි නිව් සවුත්වේල්ස් ප්රාන්ත බලධාරීන් සඳහන් කළේ.
මෙමගින් කිසියම් සිදුවීමක් සඳහා ප්රතිචාර දැක්වීමට පෙර හදිසි සේවා කණ්ඩායම් නිලධාරීන්ට එම සිදුවීමේ සැබෑ ස්වරූපය දැක ගැනීමට හැකිවීමෙන් ඊට ප්රතිචාර දැක්විය යුතු ආකාරය සම්බන්ධයෙන් පැහැදිළි අදහසක් ලබා ගැනීමට ද හැකි වනවා.
සාමාන්යයෙන් නිව් සවුත්වේල්ස් පොලිසියට දිනකට හදිසි ඇමතුම් 1500කට වඩා ලැබෙන අතර මෙම තාක්ෂණය මගින් අදාළ ඇමතුම් සඳහා ඵලදායී ප්රතිචාර දැක්වීමට උපකාරී වනු ඇති බවයි සඳහන් වන්නේ.
