ගතවූ වසර අටක පමණ කාලයකින් පසු බටහිර ඔස්ට්රේලියාවේ මාර්ග අනතුරු මරණ සංඛ්යාව වාර්තාගත ඉහළම මට්ටමට පැමිණීම හේතුවෙන් නව නීති හඳුන්වා දීමට බලධාරීන් සැලසුම් කර තිබෙනවා.
දුරකථන භාවිතා කරමින් රිය ධාවනය කරන පුද්ගලයන්ගේ ජංගම දුරකථන රාජසන්තක කෙරෙන නීති, ලබන මාසයේ පැවැත්වෙන බටහිර ඕස්ට්රේලියාවේ මාර්ග ආරක්ෂණ සමුළුවේදී ගෙන ඒමට නියමිතයි.
මෙම වසරේ ගතවූ කාලසීමාව තුළ ප්රාන්තයේ රිය අනතුරු හේතුවෙන් පුද්ගලයින් 118 දෙනෙකුට ජීවිත අහිමි වීමත් සමග මෙම නව නීති හඳුන්වා දීමට සැලසුම් කර තිබෙනවා.
මාර්ග ආරක්ෂණ කවුන්සිලයේ හිටපු සභාපති මරේ ලැම්පාර්ඩ් (Murray Lampard) පැවසුවේ අනාරක්ෂිත රිය පැදවීම සම්බන්ධයෙන් දැඩි ක්රියාමාර්ගයක් ගත යුතු කාලය එළඹ ඇති බවයි.
නීති විරෝධී ලෙස දුරකථන භාවිත කරන රියදුරන්ගෙන් ජංගම දුරකථන රාජසන්තක කිරීම එක් පියවරක් පමණක් වන අතර ඔවුන්ට තම දුරකථනය නැති වනු ඇතැයි බියක් ඇත්නම් රිය ධාවනයේදී එය භාවිතා කිරීම ගැන දෙවරක් සිතනු ඇති බවයි ඔහු පෙන්වා දෙන්නේ.
බටහිර ඔස්ට්රේලියා රජය මෙම වසර අවසානයේදී ජංගම දුරකථන භාවිත කිරීම මෙන්ම ආසන පටි පැළඳ සිටින්නේ ද යන්න සොයා බැලීමේ කැමරා පද්ධතියක් ස්ථාපිත කිරීමට ද නියමිතයි.
අගමැති රොජර් කුක් සඳහන් කළේ අනතුරු වළක්වා ගැනීම වෙනුවෙන් රජයක් ලෙස ගත හැකි සෑම පියවරක්ම ගන්නා බවයි.
