අඩුම කාලයකින් වැඩිම වේගයෙන් අලෙවි වන නිවාස පර්ත් නගරයේ

ඔස්ට්‍රේලියාවේ ඉතා වේගයෙන්ම අලෙවි වන නිවාස සහිත තදාසන්න ප්‍රදේශ පිළිබද නවතම වාර්තාවක් නිකුත් කර තිබෙනවා.

නව වාර්තා අනුව ඔස්ට්‍රේලියාවේ සාමාන්‍ය නිවසක් අලෙවි වීම සදහා දින 30ක කාලයක් ඇස්තමේන්තු ගත කර තිබුණ ද දින 8ක් වැනි කෙටි කලකින් අලෙවි වන නිවාස අනුවයි මෙම ශ්‍රේණිගත කිරීම සිදුකර ඇත්තේ.

නිවාස වේගයෙන්ම අලෙවි වන ප්‍රමුඛතම තදාසන්න ප්‍රදේශය ලෙස පර්ත්හි Leda ප්‍රදේශය නම් කර ඇති අතර එහි නිවසක සාමාන්‍ය අගය සටහන්ව ඇත්තේ ඩොලර් 528,000ක් ලෙසයි.

එම ශ්‍රේණිගත කිරීමේ දෙවන ස්ථානයට පත්ව ඇත්තේ දින 10වැනි කෙටි කලකින් නිවසක් අලෙවි වන පර්ත්හි Brookdale ප්‍රදේශය වන අතර එහි සාමාන්‍ය නිවාස මිල අගය ඩොලර් 485,000ක්.

එම ශ්‍රේණිගත කිරීමේ තුන්වන තැනට පත්ව ඇත්තේ දින 12ක් වැනි කාලයකින් නිවාස අලෙවි වන ප්‍රදේශ දෙකක් වන පර්ත් හි Hillman සහ බටහිර ඔස්ට්‍රේලියාවේ Darling Downs ප්‍රදේශයි.

එම ශ්‍රේණිගත කිරීමේ පස්වන ස්ථානයට සිඩ්නිහි Normanhurst සහ Dean Park නම් කර ඇති අතර එහි නිවසක සාමාන්‍ය විකුණුම් මිල සටහන්ව ඇත්තේ පිළිවෙළින් ඩොලර් 1,928,000, සහ ඩොලර් 905,000ක් ලෙසයි.

පර්ත් හි Seville Grove ප්‍රදේශය නිවාස වේගයෙන් අලෙවි වන තදාසන්න ප්‍රදේශ අතර 8වන ස්ථානයට පත්ව ඇති අතර දින 15ක් වැනි කෙටි කළෙකින් ඉතා ඉක්මනින් එහි නිවාස අලෙවි වන බව සඳහන්.

ඒ අනුව ඉතා ඉක්මනින් නිවාස අලෙවි වන තදාසන්න ප්‍රදේශ අතුරින් වැඩි ප්‍රමාණයක් පර්ත් නගරයේ පිහිටා ඇති බවයි සඳහන් වන්නේ.