පදිකයන් මෙන්ම රියදුරන් අනතුරු සහ තුවාලවලට ලක්වීම හමුවේ මෙල්බන් නගරයේ ඊ-ස්කූටර් කුලියට දීම තහනම් කිරීමට සැලසුම් කර තිබෙනවා.
මෙම පියවර මගින් නගරයේ පුද්ගලික ඊ-ස්කූටර් භාවිතයට බලපෑමක් සිදු නොවන බවයි සඳහන් වන්නේ.
මෙල්බර්න් නගරාධිපති නික් රීස් (Nick Reece) විසින් කමිටු රැස්වීමකදී ඊ-ස්කූටර තහනමට අදාළව යෝජනාවක් ඉදිරිපත් කරන බව සඳහන්.
ගෙන ඒමට නියමිත යෝජනාව මගින් මෙල්බන් නගරයේ ඊ-ස්කූටර් ලබා දෙන්නන් වන Lime සහ Neuron ආයතනවල ගිවිසුම් අවලංගු කරන ලෙස ඉල්ලා ඇති අතර එමඟින් ස්කූටර් 1500ක් පමණ නගරයෙන් ඉවත් වනු ඇති.
මෙම යෝජනාව ක්රියාත්මක වුව හොත් බොහෝ දුරට ලබන සැප්තැම්බර් මාසයේ සිට මෙල්බන් නගරයේ ඊ-ස්කූටර් කුලියට දීම තහනම් කෙරෙන බව වාර්තා වනවා.
ගත වූ වසර දෙකක කාලය තුල මෙල්බන් අවට ඊ-ස්කූටර් අනතුරු හේතුවෙන් පුද්ගලයන් සිය ගණනක් බරපතල තුවාල සහිතව හදිසි ප්රතිකාර අංශ වෙත යොමු කර තිබෙනවා.
ඒවා පදවන්නන් අඛණ්ඩව මාර්ග නීති කඩ කරමින්, අන් අයට සහ තමන්ව ද අනතුරට පත් කර මාර්ගවල ගැටලු මතු කරන බවයි නගරාධිපතිවරයා සඳහන් කළේ.
ඊ-ස්කූටර් මෙල්බන් නගරයට හඳුන්වා දීමට පෙර සිදු කළ අත්හදා බැලීමේදී ගෙන ආ හැකිව තිබූ ආරක්ෂක පියවර නොගැනීම ද මෙම තත්වයට හේතුවක් බවට මත පලවී තිබෙනවා.
