ඔස්ට්‍රේලියාවේ වෛද්‍යවරුන්ගේ හිඟයක්?

පුළුල් පරාසයක රෝගී තත්වයන් සහ සෞඛ්‍ය ගැටළුවලට ප්‍රතිකාර කිරීමේ වෛද්‍යවරුන්ගේ හිඟය සඳහා කඩිනම් ක්‍රියාමාර්ගයක් ගන්නා ලෙස වෛද්‍යවරු රජයෙන් ඉල්ලීමක් කරනවා.

සෞඛ්‍ය හා වයස්ගත සත්කාර දෙපාර්තමේන්තුවේ (Department of Health and Aged Care) ශ්‍රම බල කාය පිළිබඳ නව වාර්තාවකින් පෙන්නුම් කළේ ඔස්ට්‍රේලියාව මේ වන විට පූර්ණ වෛද්‍යවරුන් 2460කගේ හිඟයකට මුහුණ දී සිටින බවයි.

2033 වන විට එම හිඟය 5560 දක්වා වර්ධනය වනු ඇති බවටයි පුරෝකථනය කර ඇති අතර රජයේ හදිසි මැදිහත්වීමේ අවශ්‍යතාවය මෙමගින් පෙන්නුම් කෙරෙන බව ඔස්ට්‍රේලියානු වෛද්‍ය සංගමය ප්‍රකාශ කළා.

වෛද්‍ය ක්ෂේත්‍රයේ ශ්‍රම බලකාය නැවත ඉහළ නැංවිය යුතු අතර, එය ආරම්භ කළ යුත්තේ වැඩි වශයෙන් වෛද්‍යවරුන් පුහුණු කිරීම සහ අවශ්‍යතා ඇති ප්‍රදේශවල සේවය කිරීමට ඔවුන්ට සහාය වීම මගින් බවයි වෛද්‍ය සංගමය පෙන්වා දෙන්නේ.

ඒ සඳහා වෛද්‍ය විද්‍යාලයෙන් ආරම්භ වන පුළුල් ප්‍රතිපත්ති වෙනසක් අවශ්‍ය වන අතර වෛද්‍යවරුන්ට ඔවුන්ගේ වෘත්තීය ජීවිතයේ මුල් කාලයේ සාමාන්‍ය රෝගී සේවයේ නිරත වීමට වැඩි අවස්ථා තිබිය යුතු බව ද ප්‍රකාශ වී තිබෙනවා.