ශ්රම බලකායට බැඳීමට කැමති ඕස්ට්රේලියානුවන් මිලියනයකට වඩා වැඩි පිරිසකට එම අවස්ථා අහිමි වී ඇති බව ඕස්ට්රේලියානු සංඛ්යාලේඛන කාර්යාංශයේ නව වාර්තාවට අනුව හෙළිවී තිබෙනවා.
සංඛ්යාලේඛන කාර්යාංශයේ නවතම දත්තවලට අනුව ශ්රම බලකායට අයත් නොවන ඔස්ට්රේලියානුවන් මිලියන 1.1ක් සති හතරක් වැනි කාලයක් ඇතුළත වැඩ කිරීමට සූදානම් බවයි ප්රකාශ කර ඇත්තේ.
වැටුප් සහිත රැකියාවක් නොමැති ඔස්ට්රේලියානුවන් සංඛ්යාව දෙසැම්බර් කාර්තුවේ පැවති මිලියන 3.3ක සංඛ්යාවේ සිට මිලියන 3.4 දක්වා වැඩි වී තිබෙනවා.
රැකියාවක නිරත වීමට කැමැත්තෙන් පසුවන ඔස්ට්රේලියානුවන්ට ඒ සඳහා අවස්ථාවක් නොමැති වීමට ප්රධානතම හේතු අතර දරුවන් රැකබලා ගැනීම සහ දිගු කාලීන ආබාධිත තත්ත්වයන් පවතින බව සඳහන්.
මෙම වසරේ මාර්තු මාසය වන විට වැටුප් සහිත රැකියාවක් නොමැති වයස අවුරුදු 18ත් 75 අතර වයසේ පසු වූ මිලියන 3.4ක පමණ පිරිසකින් මිලියන 1.3 කට රැකියාවක් අවශ්ය බව ප්රකාශ කළ අතර මිලියන 1.1ක පමණ පිරිසක් සති හතරක් ඇතුළත රැකියාවට පැමිණීමට සූදානම් බව හෙළිවී තිබෙනවා.
වයස අවුරුදු 25ත් 39ත් අතර කාන්තාවන්ට රැකියාවක නිරත වීමට පැවති ප්රධාන බාධකය දරුවන් රැකබලා ගැනීම වන අතර එය පසුගිය දෙසැම්බර් මාසයේ පැවති සියයට 54ක අගය මාර්තු මාසය වන විට සියයට 64ක් දක්වා වැඩි වී ඇති බවයි වාර්තා වන්නේ.
ඊට අමතරව භාෂා ගැටලු, අධ්යාපන මට්ටම් සහ වයස් වෙනස්කම් ද රැකියා සම්බන්ධ අනෙක් ප්රධාන බාධක ලෙස දක්වා තිබෙනවා.
සමීක්ෂණයට ලක් වූවන්ගෙන් 12,000ක පමණ පිරිසක් සඳහන් කළේ තම ආබාධිතභාවය සේවා යෝජකයන් අධෛර්යමත් කරනු ඇතැයි විශ්වාස කරන අතර එය රැකියාවක් සොයා ගැනීමට ඇති විශාල දුෂ්කරතාවයක් බවයි.
බොහෝ දුරට පූර්ණ කාලීන රැකියා 50,000ක් නිර්මාණය වී තිබියදීත් ඔස්ට්රේලියාවේ විරැකියා අනුපාතය ජුනි මාසයේදී සියයට 4.1 දක්වා ඉහළ ගොස් ඇති බවයි සංඛ්යාලේඛන කාර්යාංශයේ දත්ත පෙන්වා දෙන්නේ.
