ශ්‍රී ලංකාව තුළ බුර්කාව සහ නිකාබය පැළඳීමේ තහනමක් පැනවීම සඳහා රජය මෙතෙක් තීරණයක් ගෙන නොමැති බව විදේශ අමාත්‍යංශයේ ලේකම් අද්මිරාල් මහාචාර්ය ජයනාත් කොළඹගේ මහතා පවසනවා.
එය හුදෙක් යෝජනාවක් පමණක් වන අතර දැනට සාකච්ඡාවට භාජනය වෙමින් පවතින බවයි ඔහු කියාසිටියේ.
පාස්කු ඉරුදින එල්ල වූ ප්‍රහාර පිළිබඳ ජනාධිපති විමර්ශන කොමිෂන් සභාවේ විමර්ෂණයන්ට අනුව, ජාතික ආරක්ෂක හේතුන් මත අවශ්‍ය වන පූර්වාරක්ෂාව, මෙම යෝජනාව සඳහා පදනම් වී ඇතැයි විදේශ අමාත්‍යංශය නිකුත් කල නිවේදනයක සඳහන්.
ශ්‍රී ලංකාව තුළ බුර්කාව සහ නිකාබය තහනම් කිරීමේ යෝජනාවක් සම්බන්ධයෙන් කරන ලද ප්‍රකාශ පිළිබඳව මෑත කාලීන මාධ්‍ය වාර්තා සැළකිල්ලට ගෙන අමාත්‍යංශය මෙම නිවේදනය නිකුත් කර තිබෙනවා.
රජය විසින් අදාළ සියලූ පාර්ශව සමග පුළුල් සංවාදයක් ආරම්භ කරනු ඇති අතර, අවශ්‍ය උපදේශන පැවැත්වීම සහ එකගතාවකට පැමිණීම සඳහා ප්‍රමාණවත් කාලයක් වැය කිරීමට නියමිත බවයි එහි වැඩිදුරටත් දැක්වෙන්නේ.
