සැමියා අතින් මරණයට පත්වූ ලාංකික මවගේ පුතා අධිකරණයට සියල්ල හෙළි කරයි

මෙල්බන් සැන්ඩ්හර්ස්ට් ප්‍රදේශයේ නිවසකදී තම සැමියා අතින් ඝාතනයට ලක්වූ ශ්‍රී ලංකික කාන්තාවගේ පුත්‍රයා අද අධිකරණය හමුවේ සාක්ෂි ලබාදී තිබෙනවා.

තම පියා කෝපයෙන් මවට පහරදීමත් සමග උදව් ඉල්ලා කෑ ගසමින් දිව ගිය තමන් පසුපස ද පියා පොරොවක් රැගෙන හඹා ආ බවයි ඔහු හෙළි කර ඇත්තේ.

2022 වසරේ දෙසැම්බර් 3 වනදා මාසයේදී තම නිවසේදී සිදු වූ මෙම ඝාතනය සම්බන්ධයෙන් දිනුෂ් කුරේරා නම් සැකකරුගේ 19 හැවිරිදි පුත්‍රයා අද ශ්‍රේෂ්ඨාධිකරණයේ ජූරි සභාවකට සාක්ෂි ලබාදී තිබෙනවා.

මව මිය යන අවස්ථාව වන විට 17 හැවිරිදි වියේ පසුවූ එම තරුණයා අද ජූරි සභිකයන් 14 දෙනෙකුට වීඩියෝ මාර්ගයෙන් සාක්ෂි ලබා දුන් බව සඳහන්.

සැකකරු විසින් මෙම කාන්තාවට පොරොවකින් පහරදුන් ආකාරය සහ ගිලන් රථයක් ගෙන්වා ගැනීමට තමන් කළ උත්සාහය අවහිර කළ ආකාරය ද මෙම පුත්‍රයා අධිකරණයට හෙළිකර තිබෙනවා.

පැන යාමට තැත් කළහොත් නිවසටපෙට්‍රල් දමා ගිනි තබා සියලු දෙනා මරා දමන බවට ද පියා තර්ජනය කළ බවයි මෙම තරුණයා කියාසිටියේ.

මේ අතර 47 හැවිරිදි සැකකරු තම බිරිඳ වූ නෙලෝමි පෙරේරා ඝාතනය කළ බව පිළිගෙන ඇති අතර තම ජීවිතය බේරා ගැනීම සඳහා ආත්මාරක්ෂාවට එම පියවර ගත් බව අධිකරණය හමුවේ ප්‍රකාශ කර තිබෙනවා.

ඝාතනය සම්බන්ධයෙන් එල්ල වී ඇති චෝදනා කිහිපයක් ඔහු ප්‍රතික්ෂේප කරන අතර පුත්‍රයාට පහර නොදුන් බවයි සඳහන් කර ඇත්තේ.

දිනුෂ් කුරේරාගේ පුත්‍රයා මෙම ඝාතනය පිළිබඳ වීඩියෝ මාර්ගයෙන් විස්තර කළ ආකාරය ඔහු හැඟීම් විරහිතව බලා සිටි බව අධිකරණ වාර්තාවල දැක්වෙනවා.