වාහන නැවැත්වීමේ ස්ථාන කලින් වෙන්කරවා ගැනීමට පාරිභෝගිකයින්ට අවස්ථාවක් ලබා දුන් ජපානයට අනුබද්ධිත සමාගමකට ෆෙඩරල් අධිකරණය විසින් ඩොලර් මිලියන 11කට ආසන්න දඩයක් නියම කර තිබෙනවා.
Secure Parking ලෙසට හඳුන්වා දුන් මෙම මාර්ගගත සේවාව සම්බන්ධයෙන් එල්ල වූ චෝදනා මත සිදු කළ නඩු විභාගයකින් අනතුරුවයි මෙම දඩ මුදල් නියම කර ඇත්තේ.
ඔස්ට්රේලියානු පාරිභෝගික කොමිසම පැවසුවේ Secure Parking හි “Secure-a-Spot” ඔන්ලයින් වාහන නැවැත්වීමේ සේවාව තුළින් ජනතාව නොමග යවන අසත්ය ප්රකාශ සිදු කර ඇති බවයි.
රියදුරන්ට අවශ්ය වේලාවක සහ ඔවුන් තෝරා ගත් ස්ථානයක වාහන නැවැත්වීමේ ඉඩක් වෙන් කිරීමට මෙම සේවාව පොරොන්දු වී තිබුණ ද එම ඉඩ වෙන් කරදී නොමැති බව පාරිභෝගික කොමිසම චෝදනා කර තිබෙනවා.
පුර්ව ප්රචාරණය ඔස්සේ පොරොන්දු වූ සේවාව ලබා නොදුන් අතර පාරිභෝගිකයින් විසින් වෙන් කරවා ගත් ස්ථාන වෙත වාහන නැවැත්වීමට පැමිණි අවස්ථාවේ එම ඉඩ ඔවුන්ට ලබා ගත නොහැකි වූ බවයි විමර්ශනවලින් හෙළිවී ඇත්තේ.
2017 වසරේ ජූලි සහ 2022 වසරේ ජූනි මාසය අතර කාලය තුළ මෙම සේවාවෙන් මිලියන 10කට වඩා ස්ථාන වෙන් කිරීම් සිදු කර ඇති බව ද සඳහන්.
Secure Parking සේවාව විසින් සිඩ්නි, බ්රිස්බන්, පර්ත්, ඇඩිලේඩ්, මෙල්බන් සහ හෝබාර්ට් යන නගරවල රථ ගාල් 600කට වඩා ක්රියාත්මක කරමින් පැවතුණා.
එල්ල වූ මෙම චෝදනා සමග 2022 වසරේ ජූනි මාසයේදී, Secure Parking ඔන්ලයින් වෙන් කිරීමේ සේවාව Secure Parking – Book Online ලෙස නැවත නම් කර තිබෙනවා.
