ඔස්ට්‍රේලියාවේ පෙරපාසැල් රැසක ගුරු පුරප්පාඩු

වැටුප් විෂමතා හේතුවෙන් ඔස්ට්‍රේලියාවේ මුල් ළමාවිය අධ්‍යාපනය හා සම්බන්ධ අධ්‍යාපන සේවකයන් සියයට 60ක් ඉවත් වීමට සැලසුම් කර ඇති බව අනාවරණය වී තිබෙනවා.

මුල් ළමාවිය අධ්‍යාපනවේදීන්ගෙන් බහුතරයක් ඉදිරි වසර තුන තුළ ඉවත් වීමට සැලසුම් කරමින් සිටින අතර ඒ හේතුවෙන් එම ක්ෂේත්‍රය අර්බුධ රැසකට මුහුණපාන බවයි වාර්තා වන්නේ.

එක්සත් කම්කරු සංගමය විසින් පවත්වන ලද මත විමසුමකට අනුව මුල් ළමා විය සංවර්ධන මධ්‍යස්ථානවලින් සියයට 97ක්ම දැනටමත් ගුරු හිඟයකට මුහුණ දී ඇති බව සඳහන්.

2023 වසරේ එම මධ්‍යස්ථානවලින් සියයට 87ක් හා සසඳන විට සියයට 98ක් කාර්ය මණ්ඩල හිඟය හේතුවෙන් පීඩනයට ලක්ව ඇති බවයි වාර්තා වන්නේ.

මේ පිළිබද අදහස් දක්වමින් දෙමාපියන් සඳහන් කර ඇත්තේ ගුරු හිඟය හේතුවෙන් තම දරුවාගේ අධ්‍යාපනය බලපෑමට ලක්ව ඇති බවයි.

වැටුප් විශමතා හේතුවෙන් ගුරුවරුන් එම වෘත්තීන්ගෙන් ඉවත්ව ඇති බව අදාළ ගුරුවරුන් යොදා ගනිමින් සිදුකළ අධ්‍යනයකදී හෙළිව තිබෙනවා.

එම ගුරුවරුන්ගෙන් සියයට 90ක් තම වැටුප සියයට 25 කින් වැඩිවන්නේ නම් තවදුරටත් සේවයේ රැඳී සිටීමට සුදානම් බව ද ප්‍රකාශ කර ඇතැයි සඳහන්.

කාර්ය මණ්ඩල හිඟය හේතුවෙන් තම දරුවාට ලැබෙන අධ්‍යාපනයේ සහ රැකවරණයේ ගුණාත්මක භාවයට හානි සිදු වන බව සමීක්ෂණයට සහභාගි වූ දෙමාපියන්ගෙන් සියයට 76ක් ප්‍රකාශ කර තිබෙනවා.