කුවේට් රාජ්යයේදී සංවිධාන කර තිබූ සංගීත ප්රසංගයක් අතර ශ්රී ලාංකික කලාකරුවන් සහ සංවිධායකයන් ඇතුලු 24 දෙනෙකු අත්අඩංගුවට පත්වී ඇති බව කම්කරු හා විදේශ රැකියා අමාත්ය මනුෂ නානායක්කාර පවසනවා.
ට්විටර් සටහනක් තබමින් අමාත්යවරයා සඳහන් කළේ ජනතා විමුක්ති පෙරමුණේ එතෙර අපි සංවිධානය විසින් පසුගිය දෙවනදා පවත්වනු ලැබූ ප්රසංගයකට සහභාගි වී සිටියදී මෙම පිරිස අත්අඩංගුවට පත්වී ඇති බවයි.
මේ සම්බන්ධයෙන් තමන් කුවේට්හි ශ්රී ලංකා තානාපති කාරයාලය දැනුවත් කර ඇති අතර එහි නිලධාරීන් මෙම ශ්රී ලාංකික කලාකරුවන් ඇතුලු පිරිස නිදහස් කර ගැනීමට කඩිනමින් කටයුතු කරන බව අමාත්ය මනුෂ නානායක්කාර ප්රකාශ කළා.
අදාළ සංගීත ප්රසංගයේ දැන්වීමක් ද අමාත්ය මනූෂ නානයක්කාර සිය ට්විටර් ගිණුමට එක් තිබුණා.
උපේඛා නිර්මාණි, සමනලී ෆොන්සේකා, ඉන්ද්රචාප ලියනගේ සහ ජොලි සීයා ඇතුළු ශ්රී ලාංකික සංගීත ශිල්පීන් පිරිසක් අදාළ අවස්ථාවට එක්වන බවයි එහි දැක්වෙන්නේ.
මෙම පිරිස පසුගිය දෙවැනිදා අත්අඩංගුවට ගෙන ඇත්තේ, එම ප්රසංගය සඳහා නිසි අවසරයක් ලබා නොගැනීම හේතුවෙන් බව සඳහන්.
මේ වනවිට ඔවුන් නිදහස් කර ඇති බව විදේශ කටයුතු අමාත්යංශයේ ආරංචි මාර්ග සඳහන් කළ අතර මෙදින අත්අඩංගුවට ගත් සමස්ත සංඛ්යාව 26ක් බව ද සඳහන් වනවා.
ඉන් 24 දෙනෙකු මේ වනවිට නිදහස් කර ඇති අතර අදාළ ප්රසංගය සංවිධාන කළ සංවිධායකයන් දෙදෙනා තවදුරටත් අත්අඩංගුවේ පසුවන බව ද සඳහන්.
