ඊශ්‍රායලය සහ හිස්බුල්ලා සංවිධානය අතර ගැටුම් උත්සන්න වීමත් සමඟ ලෙබනනයේ සිටින ඔස්ට්‍රේලියානුවන්ට වහාම පිටව යන ලෙස විදේශ අමාත්‍ය Penny Wong අනතුරු අඟවා තිබෙනවා.
අමාත්‍යවරිය ඔස්ට්‍රේලියානුවන්ට දන්වා ඇත්තේ වාණිජ ගුවන් ගමන් පවතින අතරතුර ලෙබනනයෙන් පිටත්ව යන ලෙසයි.
පවතින ගැටුම්කාරී වාතාවරණය තවදුරටත් දරුණු වුවහොත් බේරූට් ගුවන් තොටුපළ වසා දැමිය හැකි බවට අවදානමක් මතුවී තිබෙනවා.
විදේශ අමාත්‍ය Penny Wong වීඩියෝ පණිවිඩයක් නිකුත් කරමින් සඳහන් කළේ ලෙබනනයේ හිස්බුල්ලා අණදෙන නිලධාරියෙකු ඝාතනය කිරීම සහ ඉරානයේ හමාස් නායකයා ඝාතනයෙන් පසු පවතින තත්වය දැඩි අවදානමක් බවයි.
ලෙබනනයේ සිටින ඔස්ට්‍රේලියානු පුරවැසියන්ට රටින් පිටත්ව යාමට හොඳම කාලය මෙය වන අතර ලෙබනනයට යාමට සුදානම් වන පුද්ගලයන්ට එම තීරණ ඉවත් කර ගන්නා ලෙසට ද අගමැතිවරිය දැනුම් දී තිබෙනවා.
ගැටුම වර්ධනය වුවහොත් බේරූට් ගුවන් තොටුපළ වසා දමනු ඇති අතර එවැනි තත්වයක් මතු වන්නේ නම් 2006 වසරේ ලෙබනන් යුද්ධයේදී ඔස්ට්‍රේලියානුවන් 5,000කට වැඩි පිරිසක් ඉවත් කිරීමට ගත් පියවර අනුගමනය කිරීමට සිදු වනු ඇති බවටයි අවධාරණය කෙරෙන්නේ.
එහෙත්, මහා පරිමාණ යුද්ධයක් ඇති වුවහොත්, එවැනි විශාල ගලවා ගැනීමේ මෙහෙයුමක් සිදු කිරීමේ හැකියාවක් පවතිනු ඇති ද යන්න සහතිකයක් ලබාදිය නොහැකි බව ද නිලධාරීන් අවධාරණය කර තිබෙනවා.
