2024 ජනාධිපතිවරණය සඳහා සමගි ජන බලවේගය නියෝජනය කරමින් විපක්ෂ නායක සජිත් ප්‍රේමදාස ඇප මුදල් තැන්පත් කර තිබෙනවා.
සමගි ජන බලවේගයේ ජනාධිපති අපේක්ෂයා ලෙස සජිත් ප්‍රේමදාස නම් කරමින් එම පක්ෂයේ මහ ලේකම් රංජිත් මද්දුමබණ්ඩාර ඇතුළු පිරිසක් අද උදෑසන මැතිවරණ කොමිෂන් සභාව වෙත ගොස් ඇප මුදල් තැන්පත් කර ඇති බවයි වාර්තා වන්නේ.
පාර්ලිමේන්තු මන්ත්‍රීවරුන් වන එස්.එම්. මරික්කාර් සහ මුජිබර් රහුමාන් ඇතුලු පිරිසක් ද එම අවස්ථාවට එක්ව සිටියා.
මෙවර ජනාධිපතිවරණ ඡන්ද විමසීම ලබන සැප්තැම්බර් මස 21 වනදා පැවැත්වීමට නියමිත අතර නාමයෝජනා භාර ගැනීම අගෝස්තු 15 වන දින සිදු කිරීමට නියමිතයි.
පසුගිය 26 වනදා ජනාධිපති රනිල් වික්‍රමසිංහ වෙනුවෙන් ජනාධිපති නීතිඥ රොනල්ඩ් සී. පෙරේරා ඇප මුදල් තැන්පත් කරනු ලැබුවා.
ස්වාධීන අපේක්ෂකයෙක් ලෙස ජනාධිපති රනිල් වික්‍රමසිංහ, සරත් කීර්තිරත්න, අභිනව නිවහල් පෙරමුණෙන් ඕෂල හේරත්, ශ්‍රී ලංකා කම්කරු පක්ෂයෙන් ඒ.එස්.පී. ලියනගේ යන අය මේ වනවිට ඇප මුදල් තැන්පත්කර තිබෙනවා.
