නිව් සවුත් වේල්ස් ප්රාන්තයේ මිලියන ගණනක් වූ කුලී නිවැසියන්ට සහනයක් ලබාදීමට ප්රාන්ත රජය පියවර ගෙන තිබෙනවා.
ඒ අනුව කුලී නිවැසියන් වෙනත් නිවසකට මාරු වන අවස්ථාවේදී ඔවුන් සිටි නිවස වෙනුවෙන් තැන්පත් කර තිබූ ඇප මුදල් නව දේපලට මාරු කිරීමට හැකි වන බවයි ප්රාන්ත රජය අද නිවේදනය කළේ.
මෙම වෙනස්කම් මගින් කුලී නිවැසියන්ට පෙර නිවස වෙනුවෙන් තැන්පත් කර ඇති ඇප මුදල් තමන් අතට ලැබීමට පෙර නව නිවසට ද ඇප මුදලක් ගෙවීමට සිදුවන ගැටලුවට විසඳුමක් ලැබෙනු ඇති බව රජයේ බලධාරීන් පෙන්වා දෙනවා.
ඔස්ට්රේලියාවේ පළමු වරට හඳුන්වා දෙනු ලබන මෙම Portable Rental Bonds Scheme වැඩසටහන සඳහා නිව් සවුත්වේල්ස් ප්රාන්ත රජය ඩොලර් මිලියන 6.6ක් ආයෝජනය කරන බව සඳහන්.
අග්රාමාත්ය ක්රිස් මින්ස් පවසන්නේ මෙම පියවර ලබන වසර ආරම්භය වන විට ක්රියාත්මක කිරීමට අරමුණු කරගෙන ඇති බවයි.
ඉහළ කුලී මිල ගණන්, නිවාස හිඟය මෙන්ම ඉහළ යන උද්ධමනය මධ්යයේ ජීවන වියදම් සහන සැලසීම අරමුණු කර ගෙන මෙම පියවර ගත් බව ද අගමැතිවරයා සඳහන් කර තිබෙනවා.
ඔහු ඊයේ ප්රාන්ත රාජ්ය කම්කරු සම්මේලනයේදී නිවේදනය කළේ කුලී නිවැසියන්ගේ අයිතිවාසිකම් ආරක්ෂා කිරීම සඳහා පොරොන්දු වූ ප්රතිසංස්කරණ යටතේ සාධාරණ හේතුවක් නොමැතිව කුලී නිවැසියන් ඉවත් කිරීම ද ඉඩම් හිමියන්ට තහනම් කරන බවයි.
