වික්ටෝරියා පාර්ලිමේන්තුවේ හිටපු ශ්‍රී ලාංකික මන්ත්‍රීවරවරයෙක් දිවි ගමනට සමුදෙයි

ඔස්ට්‍රේලියාවේ වික්ටෝරියා ප්‍රාන්ත පාර්ලිමේන්තුවේ ශ්‍රී ලාංකික මන්ත්‍රීවරයෙක් වූ ජූඩ් පෙරේරා අභාවප්‍රාප්ත වී තිබෙනවා.

මිය යන විට 71 හැවිරිදි වියෙහි පසු වූ හිටපු මන්ත්‍රීවරයා වික්ටෝරියා ප්‍රාන්ත පාර්ලිමේන්තුව නියෝජනය කරනු ලැබුවේ Cranbourne ආසනයෙන්.

ජූඩ් පෙරේරා යනු කම්කරු පක්ෂය සඳහා Cranbourne ආසනය නියෝජනය කරමින් 2002 සිට 2018 දක්වා වික්ටෝරියානු ව්‍යවස්ථාදායක සභාවේ සාමාජිකයෙකු ලෙස සේවය කළ හිටපු ඕස්ට්‍රේලියානු දේශපාලනඥයෙක්.

1953 මැයි 27 වනදා ශ්‍රී ලංකාවේදී උපත ලැබූ ඔහු මීගමුව මාරිස් ස්ටෙලා (Maris Stella College) විද්‍යාලයේ ආදි සිසුවෙක් වන අතර යාපනය විශ්වවිද්‍යාලයෙන් විද්‍යාවේදී උපාධියක් ද ලබා තිබෙනවා.

ජූඩ් පෙරේරා 2002 වසරේ වික්ටෝරියා පාර්ලිමේන්තුවට තේරී පත් වූ අතර 2003 සිට 2006 දක්වා පනත් සහ රෙගුලාසි විමර්ශන කමිටුවේ (Scrutiny of Acts and Regulations Committee) සහ 2007 සිට 2010 දක්වා පවුල් හා ප්‍රජා සංවර්ධන කමිටුවේ (Family and Community Development Committee) සභාපතිවරයා ලෙස ද සේවය කර තිබෙනවා.

ඊට අමතරව ඔහු 2011 වසරේ සිට 2014 දක්වා බහු සංස්කෘතික කටයුතු (Multicultural Affairs) සඳහා Shadow පාර්ලිමේන්තු ලේකම්වරයා ලෙස ද කටයුතු කළා..

අවමංගල්‍ය කටයුතු පිළිබඳව ඉදිරි දිනවලදී දැනුවත් කරන බවයි පවුලේ ඥාතීන් සඳහන් කළේ.