මෙල්බන් සොරකම් රැසක සුළමුල හෙළිවෙයි

මෙල්බර්න් නගරයේ සිදු වූ කොල්ලකෑම් රැසක් සම්බන්ධයෙන් පිරිමි ළමයින් හතර දෙනෙකුට පොලිස් භාරයට ගෙන තිබෙනවා.

මෙම සැකකාර ළමුන් මෙල්බර්න් නගරය පුරා සිදු වූ සන්නද්ධ මංකොල්ලකෑම් රැසකට සම්බන්ධ බවටයි සැක කෙරෙන්නේ.

ඔවුන් මෝටර් රථයක් සොරකම් කර Macleod ප්‍රදේශයට ගොස් කිරි අලෙවිසලකින් මුදල් සොරකම් කරන ආකාරය CCTV කැමරාවල ද සටහන් වී තිබෙනවා.

මෙම සිද්ධියට අදාළව සිදු කළ විමර්ශනයකදී ඊයේ පස්වරු 5.15ට පමණ Princes Freeway ප්‍රදේශයේදී ළමුන් දෙදෙනෙකු සහ තවත් දෙදෙනෙකු Clayton ප්‍රදේශයේදී අත්අඩංගුවට ගත් බවයි පොලිසිය සඳහන් කළේ.

මෙල්බර්න් නැඟෙනහිර ප්‍රදේශවල සිදු වූ බව කියන සොරකම් රැසක් සම්බන්ධයෙන් වයස අවුරුදු 14 ත් 17 ත් අතර පසුවන මෙම ළමයින්ට චෝදනා එල්ල වී තිබෙනවා.

ඔවුන් අදාළ චෝදනා මත ඉදිරියේදී අධිකරණයට ඉදිරිපත් කරන බවයි පොලිසිය සඳහන් කර ඇත්තේ.

මේ අතර මෙල්බන් Box Hill ප්‍රදේශයේ ව්‍යාපාර 5කට අනවසරයෙන් කඩාවැදී ඩොලර් දහස් ගණනක මුදල් සහ විදේශීය කුළුබඩු සොරකම් කිරීමට සම්බන්ධ 3 දෙනෙකු අත්අඩංගුවට ගෙන තිබෙනවා.

ඉරිදා අලුයම 3ට පමණ මෙම සොරකම් සිදු වී ඇති අතර ඔවුන් ඒ සඳහා පැමිණ ඇත්තේ සොරකම් කළ මෝටර් රථයකින් බවටයි පැවසෙන්නේ.

මෙම සොරකම් සම්බන්ධයෙන් අවුරුදු 25, 34 සහ 36 වයස්වල පසුවන පුද්ගලයන් 3 දෙනෙකු අත්අඩංගුවට ගෙන ඇප මත නිදහස් කර තිබෙනවා.

ඔවුන් සියලුදෙනා ලබන සැප්තැම්බර් මාසයේදී Ringwood මහේස්ත්‍රාත් අධිකරණයට ඉදිරිපත් කිරීමට නියමිතයි.