ක්වීන්ස්ලන්ඩ් ප්රාන්තයේ ඊ-ස්කූටර් හේතුවෙන් සිදුවන අනතුරු සහ තුවාල සිදුවීම් දෙගුණයකින් පමණ ඉහළ ගොස් ඇතැයි රෝහල් බලධාරීන් පවසනවා.
2021 වසරේදී 691ක් වූ ඊ-ස්කූටර් අනතුරු සංඛ්යාව 2023 වසර වන විට 1,273 දක්වා වැඩි වී ඇති බවයි ක්වීන්ස්ලන්ඩ් හදිසි සේවා දෙපාර්තමේන්තුව ප්රකාශ කළේ.
මෙම තත්වය මත ප්රාන්ත රජය ඊ-ස්කූටර් පදවන්නන් මත්පැන් භාවිත කර ඇත්ද යන්න පිළිබඳ අහඹු පරීක්ෂාවක් හඳුන්වා දීමට ද සැලසුම් කර තිබෙනවා.
මෙම වසරේ මැයි මාසය අවසන් වන විට හදිසි අවස්ථා දෙපාර්තමේන්තු විසින් ඊ ස්කූටර් අනතුරු 558ක් හඳුනාගෙන ඇති අතර එය පසුගිය 2023 වසරේ අදාළ කාලයේ වාර්තා වූ සංඛ්යාව ද අභිබවා යාමක් බව සඳහන්.
2018 වසරේ නොවැම්බර් මාසයේ සිට ඊ-ස්කූටර් අනතුරු 4,233 ක් වාර්තා වී ඇති අතර එම රෝගීන්ගෙන් සියයට 62ක් පිරිමි පුද්ගලයන් බව හෙළිවී තිබෙනවා.
මෙම රෝගීන් අතරින් බහුතරයක් හිස සහ මුහුණේ තුවාල මෙන්ම අස්ථි බිඳීම්වලට ලක්වුවන් බවයි රෝහල් බලධාරීන් කියාසිටියේ.
මෙම අනතුරුවලට ප්රධාන හේතු ලෙසට මාර්ග නීති අනුගමනය නොකිරීම, වේග සීමාවලට අනුගත නොවීම, ආරක්ෂිත හිස් ආවරණ නොපැළඳීම වැනි කරුණු ද ඔවුන් පෙන්වා දී තිබෙනවා.
