මෙල්බන් රසායනික කම්හලේ ගින්නෙන් පසු තවත් අනතුරු ඇඟවීමක්

මෙල්බන් රසායනික ද්‍රව්‍ය කම්හලක පසුගියදා ඇති වූ ගින්නෙන් පසු ඒ අවට ජනතාවට වාතයේ සහ ජලයේ ගුණාත්මක භාවය පිළිබඳ අනතුරු ඇඟවීමක් නිකුත් කර තිබෙනවා.

එම ස්ථානයෙන් පිටවන දුමාරයෙන් දිගු කාලීන බලපෑම් නොමැති වුව ද ප්‍රදේශයේ ජලය භාවිතයේදී සැලකිලිමත් වන ලෙසටයි ජනතාවට අනතුරු අඟවා ඇත්තේ.

ගින්න මැඩපැවැත්වීම සඳහා විශාල ජලය ප්‍රමාණයක් භාවිත කළ බැවින් රසායනික ද්‍රව්‍ය මිශ්‍ර වී ඇති එම ජලය සාමාන්‍ය ජල මාර්ගවලට එක්වීම මෙම අනතුරු ඇඟවීමට හේතුවයි.

කෙසේවෙතත් එම ජලය පානීය ජල මාර්ගයක් නොවන බැවින් නිවෙස් වෙත ලැබෙන ජලය පානය කිරීමට අවදානමක් නොමැති බව දැනුම් දෙනවා.

කම්හල ආශ්‍රිතව පිහිටි ජල මුලාශ්‍රවලට සිදු වූ බලපෑම නිසි ලෙස තහවුරු කර ගන්නා තෙක් මහජනතාවට ප්‍රදේශයේ ජල මාර්ගවලට ප්‍රවේශ නොවන ලෙසටයි උපදෙස් ලබාදී ඇත්තේ.

බදාදා පෙරවරු 11.20ට පමණ ගටගත් ගින්න ගිනි නිවන භටයින් 180ක් සහ ගිනි නිවීම් රථ 50කට වැඩි ප්‍රමාණයක් යොදා ගනිමින් පස්වරු 3.30ට පමණ පාලනය කර තිබුණා.

වික්ටෝරියා ප්‍රාන්ත බලධාරීන් සඳහන් කළේ ගිනි ගැනීම සිදුවන අවස්ථාවේදී කර්මාන්තශාලාව ආශ්‍රිතව රසායනික ද්‍රව්‍ය රැසක් පැවති බවයි.