අද (09/03) දිනයේදී පැවති ඔස්ට්‍රේලියානු මූල්‍ය සමාලෝචන ව්‍යාපාර සමුළුවේදී ඔස්ට්‍රේලියානු අග්‍රාමත්‍ය Scott Morrison විසින් කොරෝනා වසංගතය හමුවේ ආර්ථිකය ගොඩ නැංවීම පිණිස ගතයුතු ක්‍රියාමාර්ග පිළිබඳව තම අදහස් ප්‍රකාශ කර සිටියේය.
එහිදී ඔහු පැව්සූවේ තාවකාලික වීසා බලපත්‍රලාභීන් ඔස්ට්‍රේලියානු රැකියා වෙළෙඳපොළේ ඇති අත්‍යවශ්‍ය සහ තීරණාත්මක රැකියා පුරප්පාඩු පිරවීම සඳහා යොදා ගන්නේ කෙසේද යන්න පිළිබඳව සලකා බලන බවයි.
කොරෝනා වසංගතය හමුවේ ජාත්‍යන්තර සංක්‍රමණිකයින් (backpackers) නොමැතිවීම නිසා දැඩි ශ්‍රම හිඟයකට මුහුණ දී ඇත්තේ ඔස්ට්‍රේලියාවේ කෘෂිකාර්මික ක්ෂේත්‍රය වේ. මේ අනුව, තාවකාලික වීසා බලපත්‍රලාභීන් කෘෂිකර්මාන්තය සහ ආගන්තුක සත්කාර කර්මාන්තය (hospitality) වැනි අංශ සඳහා යොමු කිරීමට අදාල මාර්ග පිළිබඳව ඔස්ට්‍රේලියානු මධ්‍යම රජය සලකා බලන බවද අගමැති සඳහන් කලේය.
තවදුරටත් ඔහු අදහස් දක්වමින් ප්‍රකාශ කර ඇත්තේ තාවකාලික වීසා හිමියන් හැකිතාක් ප්‍රාදේශීය ඕස්ට්‍රේලියානු ප්‍රදේශ කරා යොමු කිරීම හා අදාල මාර්ගයන් සකස් කිරීමට කටයුතු කරන බවයි.
COMMENTS