සිඩ්නි ලාලෝරා පාර්ක් (Lalor Park) ප්රදේශයේදී නිවසක ඇතිවූ ගින්නකින් දරුවන් තිදෙනෙකු මියයාම ගෘහස්ථ හිංසනය හේතුවෙන් සිදු වූ මිනී මැරුමක් ලෙසට සලකා විමර්ශන සිදු කරන බව නිව් සවුත්වේල්ස් පොලිසිය පවසනවා.
ඊයේ අලුයම 1ට පමණ හටගත් ගින්න සමග හදිසි සේවා කණ්ඩායම් මෙම ළමයින් බේරා ගැනීමට කළ උත්සාහයට ද සැකකාර 28 හැවිරිදි පුද්ගලයා බාධා කර ඇති බවයි පැවසෙන්නේ.
අසල්වාසීන් හදිසි ඇමතුම් අංශයට කළ දැනුම් දීමකට අනුව පොලිසිය සහ ගිනි නිවීම් ඒකකය එම ස්ථානයට පැමිණ තිබූ අතර කාන්තාවක් සහ පිරිමි පුද්ගලයෙක් මෙන්ම කුඩා ළමයින් 7 දෙනෙකු එහි සිට තිබෙනවා.
වයස අවුරුදු 3 සහ 6 වයස්වල පසු වූ කුඩා ළමයින් දෙදෙනෙකුට එම ස්ථානයේදී ප්රතිකාර ලබා දුන්න ද ඔවුන් බේරා ගැනීමට හැකි වී නැහැ.
ගින්න මැඩ පැවැත්වීමෙන් පසු නිවස තුළ මියගොස් සිටි මාස 10 ක් වයසැති බිලිඳෙක් සොයා ගැනුණා.
සහන සේවා කණ්ඩායම් ගින්න මැඩ පැවැත්වීමට උත්සාහ කරන අවස්ථාවේ සැකකාර පියා ළමයින් නැවතත් නිවස තුළට තල්ලු කළ බවට ද චෝදනා එල්ලවී තිබෙනවා.
මෙම ළමයින්ගේ මරණයට මෙම 28 හැවිරිදි සැකකරුගේ ක්රියාව සෘජුවම හේතු වූ බවටයි පොලිසිය පවසන්නේ.
වයස අවුරුදු නවයක ගැහැණු ළමයෙකු සහ වයස අවුරුදු 4, 7 සහ 11 යන වයස්වල පිරිමි ළමයින් තිදෙනෙකු මෙන්ම 29 හැවිරිදි කාන්තාවක් ද වෙස්ට්මීඩ් රෝහලට ඇතුලත් කර තිබෙනවා.
බේරා ගැනීමෙන් පසුව මෙම දරුවන් ප්රකාශ කර තිබුනේ තම පියා තමන්ව මරා දැමීමට උත්සාහ කළ බවටයි.
ගින්න හේතුවෙන් බියට පත් ළමයින් ආපසු නිවස තුළට ඇදගෙන යාමට උත්සාහ කරන ආකාරය තමන් දුටු බව ප්රදේශවාසීන් ද සඳහන් කර තිබෙනවා.
ගින්නට හේතුව කුමක්ද යන්න පිළිබඳව පරීක්ෂණයක් ක්රියාත්මක බව පොලිසිය පවසන අතර සැකකරු ද කෝමා තත්වයෙන් රෝහල් ගතව පොලිස් ආරක්ෂාව යටතේ ප්රතිකාර ලබමින් පසුවනවා.
