ක්වීන්ස්ලන්ඩ් ප්රාන්තයේ ටවුන්ස්විල් හි කිර්වාන් පොලිස් ස්ථානය අසලදී පිහියකින් සන්නද්ධව සිටි පුද්ගලයෙකුට පොලිසිය කළ වෙඩි තැබීමකින් ඔහු මියගොස් තිබෙනවා.
මියගොස් ඇති 46 හැවිරිදි මෙම පුද්ගලයා ඊයේ රාත්රී 10ට පමණ පිහියක් අතැතිව කිර්වාන් පොලිස් ස්ථානය වෙත පැමිණ නිලධාරීන්ට තර්ජනය කර ඇති බවයි පැවසෙන්නේ.
පිහිය ඉවතට දමන ලෙසට පොලිස් නිලධාරීන් කළ නියෝගය නොතැකු එම පුද්ගලයාට වෙඩි තැබීමට සිදු වූ බව වැඩබලන අධිකාරී ජේසන් බ්රොස්නන් සඳහන් කළා.
පසුව පොලිස් නිලධාරීන් තුවාල ලැබූ පුද්ගලයට ප්රථමාධාර ලබාදුන්න ද ඔහු එම ස්ථානයේදීම මිය ගොස් ඇති බවයි වාර්තා වන්නේ.
මෙම පුද්ගලයා පොලිස් ස්ථානයට පැමිණි හේතුවක් අනාවරණ වී නැහැ.
මාධ්ය වාර්තා පෙන්වා දෙන්නේ ක්වීන්ස්ලන්ඩ් පොලිසිය පසුගිය වසරේ ඔස්ට්රේලියාවේ සෙසු ප්රදේශවල නිලධාරීන්ට වඩා වැඩි ප්රමාණයක් වෙඩි තැබීමේ සිදුවීම්වලට සම්බන්ධ බවයි.
