ශ්‍රී ලාංකික සම්භවයක් සහිත මන්ත්‍රීවරියක් බ්‍රිතාන්‍ය පාර්ලිමේන්තුවට

ශ්‍රී ලාංකික සම්භවයක් සහිත උමා කුමරන් බ්‍රිතාන්‍යයේ පාර්ලිමේන්තුවට තේරී පත්වී තිබෙනවා.

ඒ අනුව ස්ට්‍රැට්ෆර්ඩ් ඇන්ඩ් බොව් (Stratford and Bow) ආසනයේ පළමු මන්ත්‍රීවරිය ලෙස ඇය මෙලෙස තේරී පත්වී ඇති බවයි සඳහන් වන්නේ.

වසර 14කට පසු බ්‍රිතාන්‍යයේ මහ මැතිවරණය ජයග්‍රහණය කළ ලේබර් පක්ෂයෙන් තරග කළ ඇය ඡන්ද 19145 ක් ලබා ගනිමින් මෙලෙස තේරී පත් වී තිබෙනවා.

පසුගියදා මාධ්‍ය වෙත අදහස් දක්වමින් උමා කුමරන් ප්‍රකාශ කර තිබුණේ තමා උපත ලැබුවේ නැගෙනහිර ලන්ඩනයේ වන අතර ශ්‍රී ලංකාවේ පැවති යුද සමයේ තම දෙමාපියන් එක්සත් රාජධානියට පැමිණ ඇති බවයි.

සැබෑ සරණාගත ඉල්ලීමක් ඇති එක්සත් රාජධානියේ දෙමළ ජනතාව නැවත අනතුරට ලක්වීමට ඉඩ නොතබන බව ද ඇය ප්‍රකාශ කර තිබුණා.

උමා කුමරන් ක්වීන් මේරි විශ්ව විද්‍යාලයෙන් ආධ්‍යාපනය ලබා ඇති අතර බ්‍රිතාන්‍යයේ ජාතික සෞඛ්‍ය සේවය වෙනුවෙන් සේවය කර තිබෙනවා.

ලන්ඩනයේ නගරාධිපති සදික් ඛාන් වෙනුවෙන් දේශපාලන කටයුතුවල නිරතව ඇති ඇය දේශගුණික විපර්යාස පිළිබඳ ආයතනයක මහජන සම්බන්ධතා නිලධාරිණිය ලෙස ද සේවය කර ඇති බවයි සඳහන් වන්නේ.

කම්කරු අයිතීන් පිළිබඳ අදහස තම පවුලෙන්ම පැමිණෙන්නක් වන අතර තමාගේ සීයා යාපනයේ පළමු වෘත්තීය සමිති ක්‍රියාකාරීන් අතුරින් කෙනෙක් වන බව උමා කුමරන් ප්‍රකාශ කර තිබෙනවා.

තම පවුලේ සාමාජිකයන් ලන්ඩනය​, ඔස්ට්‍රේලියාව සහ ඇමරිකාව යන රටවල විසිර ඇති අතර යුද ගැටුම් හේතුවෙන් පවුල මෙලෙස මෙසේ විසිර පැවතීම කණගාටුදායක බවයි ඇය පවසන්නේ.