වික්ටෝරියා ප්‍රාන්තයේ මාර්ග අනතුරු අවම කිරීමේ අරමුණින් ප්‍රාන්තය පුරා නව වැඩපිලිවෙලක් රථවාහන අංශ සහ පොලිසිය එක්ව ආරම්භ කර තිබෙනවා.
ඒ අනුව මාර්ග ආරක්ෂාව සම්බන්ධයෙන් ප්‍රමුඛතාව ලබා දෙමින් ආසන පටි පැළඳීම අනිවාර්ය කිරීම, අහඹු ශ්වසන පරීක්ෂාවන් සිදු කිරීම සහ නීතිගත කිරීම, ප්‍රාන්තය පුරා වේග සීමා නිරීක්ෂණ කැමරා හඳුන්වාදීම ඇතුළු ප්‍රතිපත්ති මේ යටතේ ප්‍රමුඛ වනවා.
2050 වසර වන විට වික්ටෝරියා ප්‍රාන්තයේ මාර්ග අනුතුරුවලින් සිදුවන මරණ අවම කිරීම මෙහි අරමුණ වන අතර 2030 වසර වන විට දැනට පවතින මාර්ග අනතුරු මරණ සංඛ්‍යාව හරි අඩකින් අඩු කිරීම එහි අරමුණයි.
වික්ටෝරියානු ප්‍රජාව තුළ මාර්ග ආරක්ෂාව පිළිබඳ සංස්කෘතියක් ඇති කරමින් මාර්ග ආශ්‍රිතව සිදුවන මරණ සහ බරපතල තුවාල සිදුවීම් අවම කිරීමට අදාළ මූලෝපායන් සැලසුම් කරමින් පවතිනවා.
ජනතාව දැනුවත් කිරීම, මහා මාර්ග රථ වාහන ධාවනයට සුදුසු අයුරින් සකස් කිරීම සහ වාහනවල තත්වය නිසි පරිදි නඩත්තු කරගැනීමට උපදෙස් දීම මෙන්ම අනාරක්ෂිත වාහන මාර්ගවලින් ඉවත් කිරීම ද මෙහිදී සිදු කෙරෙන බව සඳහන්.
එසේම රැකියාව සඳහා මාර්ගය භාවිතා කරන අයගේ ආරක්ෂාව වැඩි කිරීම කෙරෙහි ද අවධානය යොමුව ඇති අතර වික්ටෝරියා ප්‍රාන්තයේ මාර්ග ආරක්ෂණ ක්‍රියාකාරී සැලැස්ම සඳහා ප්‍රවාහන දෙපාර්තමේන්තුව, වික්ටෝරියා පොලිසිය සහ සෞඛ්‍ය අමාත්‍යංශය ද එක්ව කටයුතු කරනු ලබනවා.
