එළඹෙන සති අන්තයේ පවතිනු ඇතැයි අපේක්ෂිත වැසි සහිත කාලගුණික තත්වයෙන් වික්ටෝරියා ප්‍රාන්තය ඇතුළුව සමස්ත ඔස්ට්‍රේලියාවේ මිලියන ගනනකට බලපෑම් එල්ල වනු ඇතැයි කාලගුණ අංශ අනතුරු අඟවනවා.
සිකුරාදා දිනය වන විට කිලෝමීටර් 2000ක පමණ කලාපයකට වැසි ඇති වනු ඇතැයි අපේක්ෂා කරන අතර සති අන්තය වන විට සියයට 90ක පමණ ප්‍රදේශයකට වැසි තත්වය ව්‍යාප්ත වනු ඇති බවයි පැවසෙන්නේ.
බටහිර ඔස්ට්‍රේලියාවේ කිම්බර්ලි ප්‍රදේශයේ සිට වික්ටෝරියා සහ ක්වීන්ස්ලන්ඩ් දක්වා වැසි තත්වය ව්‍යාප්ත වනු ඇති බවට අනතුරු අඟවා තිබෙනවා.
බටහිර ඔස්ට්‍රේලියාව, නිව් සවුත් වේල්ස්, ටස්මේනියා සහ වික්ටෝරියා ප්‍රාන්ත සඳහා දැඩි කාලගුණ අනතුරු ඇඟවීම් ද නිකුත් කර ඇතැයි සඳහන්.
සිඩ්නි හි සතිය මුලදී පැවති උණුසුම් කාලගුණය අවසන් වී වැසි ඇතිවීමේ ඉහළ සම්භාවිතාවක් පවතින අතර වෙරළබඩ ප්‍රදේශවලට තද සුළං ද ඇති වන බවටයි අනතුරු අඟවා ඇත්තේ.
සිකුරාදා සහ සෙනසුරාදා මෙල්බර්න් සහ ඒ අවට ප්‍රදේශවලට තද වැසි ඇති වන අතර ඉරිදා වන විට එම තත්වය පහව යනු ඇතැයි අපේක්ෂිතයි.
මෙල්බර්න් හි වර්ෂාපතනය ඇති වීමේ සියයට 60ක සම්භාවිතාවක් පවතින අතර පැයට කිලෝමීටර් 25 පමණ දක්වා වේගයෙන් සුළං ද ඇති විය හැකි බව සඳහන්.
