T20 ලෝක කුසලානයට අදාළව නෙදර්ලන්තය සමග ඊයේ පැවති පළමු පුහුණු තරගයෙන් ශ්‍රී ලංකා කණ්ඩායමට ලකුණු 20ක පරාජයක් හිමිවී තිබෙනවා.
අමෙරිකාවේ ෆ්ලෝරිඩාහිදී පැවති තරගයේ කාසියේ වාසිය දිනු ශ්‍රී ලංකා කණ්ඩායම තීරණය කළේ පළමුව පන්දු රැකීම ටයි.
ඒ අනුව පන්දුවට පහරදීම සඳහා පිටියට පිවිසි නෙදර්ලන්ත කණ්ඩායම නියමිත පන්දුවාර 20 අවසානයේදී කඩුලු 5ක් දැවී ලකුණු 181ක් රැස් කළා.
ඩිල්ෂාන් මධුෂංක ලකුණු 39ට කඩුලු දෙකක් බිඳ හෙලුවා.
මෙම තරගයේදී ශ්‍රී ලංකා කණ්ඩායමේ ප්‍රධාන පන්දු යවන්නන් වන වනිඳු හසරංග, මතීෂ පතිරණ සහ මහීෂ් තීක්ෂණ පන්දු යවා තිබුණේ නැහැ.
ලකුණු 182ක ජයග්‍රාහී ඉලක්කයක් හඹා යෑමට පිටියට පිවිසි ශ්‍රී ලංකා කණ්ඩායමට පන්දුවාර 18යි පන්දු 5කදී සියලුදෙනා දැවී රැස්කර ගත හැකි වූයේ ලකුණු 161ක් පමණයි.
ශ්‍රී ලංකා මුල් පෙළ පිතිකරුවන් අසාර්ථක වෙද්දී වනිඳු හසරංග පන්දු 15කින් ලකුණු 35ක් රැස්කිරීමට සමත් වුණා.
දසුන් ශානක ලකුණු පන්දු 20කදී නොදැවි ලකුණු 35ක් රැස්කළ අතර ධනංජය ද සිල්වා ලකුණු 31ක් ලබා ගත්තා.
ශ්‍රී ලංකා කණ්ඩායම සහභාගි වන දෙවන පුහුණු තරගය ලබන 31 වනදා අයර්ලන්තයට සමග පැවැත්වීමට නියමිතයි.
