ෆොසිල ඉන්ධන භාවිතය ඉවත් කරන ලෙසට ඉදිරිපත් වන ගෝලීය ඉල්ලීම් නොතකා 2050 වන විට ගෑස් නිස්සාරණය සහ භාවිතය වේගවත් කරන බව රජය නිවේදනය කර තිබෙනවා.
රජය පවසන්නේ දේශගුණ විපර්යාස අවම කිරීමේ වැඩසටහනට සහාය වන අතරම ගෘහස්ථ බලශක්ති සැපයුම ඉහළ නැංවීම සඳහා මෙම පියවර අවශ්‍ය වන බවයි.
එහෙත් මෙම තීරණය විද්‍යාව ප්‍රතික්ෂේප කිරීමක් වන අතර, දේශගුණික ඉලක්ක කරා ළඟාවීම සඳහා ගල් අඟුරු, ඉන්ධන සහ ගෑස් භාවිතයේ දැවැන්ත පහත වැටීමක් සිදු විය යුතු බවටයි විවේචකයින් තර්ක කරන්නේ.
ලොව විශාලතම ස්වභාවික ද්‍රව වායු අපනයනය කරන රටවලින් එකක් ලෙසට ඔස්ට්‍රේලියාව තබාගෙන ඇති නාමය රඳවා ගැනීමේ අරමුණින් විශ්වාසනීය වෙළඳ හවුල්කරුවෙකු වීමට ඇති කැපවීම පෙන්වීමට මෙම තීරණය ගෙන ඇති බව ද රජය ප්‍රකාශ කර තිබෙනවා.
ෆොසිල ඉන්ධන නිෂ්පාදනය සහ ගවේෂණය යන දෙකම වැඩි කිරීමට කර්මාන්ත සහ රාජ්‍ය නායකයින් සමඟ ක්‍රියා කිරීමේ රජයේ සැලසුම් පසුගියදා ගෙනහැර දක්වනු ලැබුවා.
ඒ අනුව බටහිර ඕස්ට්‍රේලියාවේ චෙව්රොන් (Chevron) සහ වුඩ්සයිඩ් එනර්ජි ගෘප් (Woodside Energy Group) විසින් පවත්වාගෙන යනු ලබන විශාලතම ගෑස් ව්‍යාපෘති ප්‍රවර්ධනයට රජය අඛණ්ඩව සහාය දක්වනු ඇති.
2030 වසර වන විට විදුලිබල පද්ධතියට සියයට 82ක් පුනර්ජනනීය බලශක්තිය ලබා දීම සහ 2050 වන විට කාබන් විමෝචනය ශුන්‍ය කිරීමේ අරමුණ සාක්ෂාත් කර ගැනීමේ ඉලක්ක කරා ගමන් කරන බැවින් ඔස්ට්‍රේලියාවේ ගෘහස්ථ බලශක්ති සැපයුම සඳහා මෙම පියවර අවශ්‍ය බවයි රජය පෙන්වා දෙන්නේ.
දැනට රටේ පවතින බලශක්ති අවශ්‍යතාවයෙන් සියයට 27ක් ගෑස් මගින් සිදු කෙරුණ ද දේශීය නිෂ්පාදනවලින් වැඩි ප්‍රමාණයක් අපනයනය කරනු ලබන්නේ චීනය, ජපානය සහ දකුණු කොරියාව වැනි රටවලටයි.
රජයේ දත්ත වලට අනුව ඔස්ට්‍රේලියාවේ සමස්ත කාබන් විමෝචනයෙන් හතරෙන් එකකට ගෑස් වගකිව යුතු බවයි සඳහන් වන්නේ.
