අග්‍රාමාත්‍ය ස්කොට් මොරිසන් පවසන්නේ ඕස්ට්‍රේලියාව විසින් ෆයිසර් කොරෝනා වයිරස් එන්නත තවත් මිලියන 10 ක් ලබාගෙන ඇති බවයි.
අමතර මාත්‍රාවලින් රටේ එන්නත් සංඛ්‍යාව මිලියන 150 දක්වා ඉහළ නැංවේ.
ඕස්ට්‍රේලියාවේ මිලියන 150 ක එන්නත් මාත්‍රාවලට ෆයිසර් එන්නත මිලියන 20 ක්, ඔක්ස්ෆර්ඩ්-ඇස්ට්‍රාසෙනෙකා එන්නත මිලියන 53.8 කට වඩා, නොවාක්ස් එන්නත මිලියන 51 ක් සහ කොවාක්ස් ජාත්‍යන්තර පහසුකම් ගිවිසුම යටතේ ඒකක මිලියන 25.5 ක් ඇතුළත් වේ.
සංක්‍රමණික තත්වය නොසලකා ඕස්ට්‍රේලියානු භූමියේ වෙසෙන සියලුම ජනතාවට මෙම එන්නත නොමිලේ ලබා දෙන බව සෞඛ්‍ය අමාත්‍ය ග්‍රෙග් හන්ට් ඊයේ නිවේදනයක් නිකුත් කරමින් පැහැදිළි කලේය.
එනම්, ඕනෑම වීසා හිමියෙකුට මෙම එන්නත් නොමිලේ ලබා ගත හැකි වේ. මෙයට සරණාගතයින්, තාවකාලික ආරක්ෂණ වීසා බලපත්‍රලාභීන් සහ Bridging වීසා බලපත්‍රලාභීන් ඇතුළත් වේ. දැනට රැඳවුම් ස්ථානවල පදිංචිව සිටින පුද්ගලයින් ද වීසා අවලංගු කර ඇති අය ද සුදුසුකම් ලබයි.
අග්‍රාමාත්‍ය ස්කොට් මොරිසන් පැවසූවේ ඕස්ට්‍රේලියානු භූමියේ සිටින සියලු දෙනාගේ ආරක්ෂාව පිළිබඳ රජය සහතික වන බවයි.
“ඕස්ට්‍රේලියානු භූමියේ සිටින සෑම කෙනෙකුම ආරක්ෂිත බව අප සහතික කළ යුතුයි. ඒ නිසා ඕස්ට්‍රේලියානු භූමියේ සිටින සෑම කෙනෙකුටම ආරක්ෂාව සඳහා ප්‍රවේශය ඇත.” අග්‍රාමාත්‍ය ස්කොට් මොරිසන් පැවසීය.
ෆෙඩරල් සෞඛ්‍ය දෙපාර්තමේන්තුවේ ලේකම් මහාචාර්ය බ්‍රෙන්ඩන් මර්ෆි පැවසුවේ ඕස්ට්‍රේලියානුවන්ට එන්නත් කිරීමට යන විට ලැබෙන කොරෝනා එන්නත් වර්ගය තෝරා ගැනීමට සාමාන්‍යයෙන් නොහැකි බවයි.
“එන්නත් ලබා දීමේදී ආරම්භක පියවරේදී පළමුව ෆයිසර් කොරෝනා එන්නත් ලබා දෙන අතර ප්‍රධාන වශයෙන් වෛද්‍ය සායන, ෆාමසි සහ වෙනත් සායන මඟින් ඇස්ට්‍රාසෙනෙකා එන්නත ලබා දෙනු ඇත” යැයි මහාචාර්ය මර්ෆි පැවසීය.
