ශ්වසන පද්ධතිය ආශ්‍රිතව බෝවන රෝගයක් වන කක්කල් කැස්ස යළි ඔස්ට්‍රේලියාව ඇතුලු ලොව පුරා රටවල් කිහිපයක ව්‍යාප්ත වෙමින් පවතින බව වාර්තා වනවා.
වාර්ෂිකව ලොව පුරා කක්කල් කැස්ස රෝගීන් හා මරණ යම් ප්‍රමාණයක් වාර්තා වුවද මේ වසරේ එහි වර්ධනයක් පෙන්නුම් කරන බව යි විදෙස් මාධ්‍ය වාර්තා කළේ.
මේ වසරේ ඔස්ට්‍රේලියාව තුළ අවම වශයෙන් රෝගීන් 3,000ක් වාර්තා වී ඇති අතර ඉන් වැඩි ප්‍රමාණයක් ක්වීන්ස්ලන්ඩ් සහ නිව් සවුත් වේල්ස් ප්‍රාන්තවලින් හඳුනාගෙන තිබෙනවා.
එක්සත් රාජධානිය, ඔස්ට්‍රේලියාව සහ යුරෝපය ඇතුළු විවිධ රටවල කක්කල් කැස්ස පැතිරීම වාර්තා වන අතර චීනය, පිලිපීනය, චෙක් ජනරජය සහ නෙදර්ලන්තය යන රටවලින් මරණ වාර්තා වී ඇතැයි සඳහන්.
විද්‍යාත්මකව පර්ටුසිස් (pertussis) ලෙස හඳුන්වන කක්කල් කැස්ස අධික ලෙස බෝවන අතර විශේෂයෙන් ළදරුවන්ට සහ ළමයින්ට එය ආසාදනය මාරාන්තික විය හැකි බවයි පැවසෙන්නේ.
මෙම වසරේ පළමු මාස දෙක තුළ පමණක් චීනයෙන් කක්කල් කැස්ස වැළඳුණු රෝගීන් 32,380 දෙනෙකු වාර්තා වී ඇති අතර සිදුවී ඇති මරණ සංඛ්‍යාව 13ක් බව විදෙස් මාධ්‍ය වාර්තා කරනවා.
එය පසුගිය වසරට සාපේක්ෂව සියයට 20ක ඉහළ යාමක් බවයි චීන බලධාරීන් සඳහන් කළේ.
පිලිපීනයේ ද කක්කල් කැස්ස රෝගීන් සංඛ්‍යාව පසුගිය වසරට සාපේක්ෂව සියයට 34ක ඉහළ යාමක් පෙන්නුම් කර ඇති බව වාර්තා වනවා.
