ඔස්ට්‍රේලියාවේ සංක්‍රාන්ති ලිංගික කාන්තාවන් සඳහා වෙන් වූ නිවාස ව්‍යාපෘතියක් සිඩ්නි නුවර ආරම්භ කිරීමට පියවර ගෙන තිබෙනවා.
සිඩ්නි හි ස්ථාපිත කෙරෙන මෙම නිවාස නිව් සවුත්වේල්ස් ප්‍රාන්තයේ සංක්‍රාන්ති ලිංගික කාන්තාවන් සඳහා වූ දැරිය හැකි මිලකට ඇති පළමු නිවාස වැඩසටහන ලෙසටයි සැලකෙන්නේ.
එමෙන්ම එය ඔස්ට්‍රේලියාවේ එවැනි පළමුවැනි ව්‍යාපෘතිය වන අතර සංක්‍රාන්ති ලිංගිකයන් ලෙස හඳුනා ගන්නා කාන්තාවන්ට ආරක්ෂිත සහ දැරිය හැකි නිවාස ලබා දීම මෙහි අරමුණයි.
සිඩ්නි නගරයේ ග්‍රීන්ස් මන්ත්‍රී සිල්වි එල්ස්මෝ පැවසුවේ සංක්‍රාන්ති ලිංගිකයන් සහ ස්ත්‍රී පුරුෂ සමාජභාවයෙන් වෙනස් වන පුද්ගලයින්ට නිවාස නොමැතිකම සහ අනාරක්ෂිතභාවයට විශේෂයෙන් ගොදුරු වන බවයි.
මෙම නිවාස වැඩසටහන ඔස්ට්‍රේලියාවේ පළමුවැන්න පමණක් නොව ලෝකයේම පළමුවැන්න බවයි ඇය කියාසිටියේ.
මෙවැනි නිවාස පිහිටුවීමට සුදුසුම ස්ථානය වන ඩාර්ලින්හර්ස්ට් හි නිවාස ව්‍යාපෘතිය ආරම්භ කෙරෙන බව ද ග්‍රීන්ස් මන්ත්‍රී සිල්වි එල්ස්මෝ සඳහන් කළා.
