ඇලිස් ස්ප්‍රින්ග්ස් ප්‍රදේශයේ තරුණ වයස්වල පසුවන්නන්ට පැනවූ ඇඳිරි නීතිය තවත් දින හයකට දීර්ඝ කර තිබෙනවා.
නොර්තන් ටෙරිටරි ප්‍රධාන අමාත්‍ය ඊවා ලෝලර් නිවේදනය කර ඇත්තේ ලබන අඟහරුවාදා පාසල නැවත ආරම්භ වන තෙක් එය ක්‍රියාත්මක කරන බවයි.
ඒ අනුව ඇඳිරි නීතිය නැවත පාසල් ආරම්භ කෙරෙන ලබන අඟහරුවාදා උදෑසන 6 දක්වා ක්‍රියාත්මක වන අතර එය පාසල් නිවාඩු කාලයම ආවරණය කරන බවයි අමාත්‍යවරිය අද පැවති මාධ්‍ය හමුවකදී සඳහන් කළේ.
නගර මධ්‍යයේ ඇති වූ ප්‍රචණ්ඩකාරී ක්‍රියා හේතුවෙන් පසුගිය මාර්තු 27 වනදා සිට සති දෙකක කාලයක් අවුරුදු 18ට යොවුන් පිරිස සඳහා සවස 6 සිට උදෑසන 6 දක්වා ඇඳිරි නීතිය පනවනු ලැබුවා.
එහි නීති රීතිවලට අනුව, ඇඳිරි නීතිය පවතින වේලාවන්හිදී නගරයේ හෝ මාර්ගවල සිටින ඕනෑම දරුවෙකු නිවසට හෝ ආරක්ෂිත ස්ථානයකට ගෙන යනු ලබන අතර අපරාධ දඬුවම් ක්‍රියාත්මක වන්නේ නැහැ.
මෙම ඇඳිරි නීතිය හඳුන්වාදීමත් සමඟ සාර්ථක ප්‍රතිඵල ලැබී ඇති අතර ඒ සම්බන්ධයෙන් සාකච්ඡා කිරීමට පැවති හමුවකදී එහි කාල සීමාව දීර්ඝ කිරීමට තීරණය කෙරුණා.
නොර්තන් ටෙරිටරි ප්‍රධාන අමාත්‍ය ඊවා ලෝලර් පැවසුවේ ඇඳිරි නීතිය පැනවීමත් සමග තදාසන්න ප්‍රදේශවල සිදු වූ සොරකම් ද අඩු වී ඇති බවයි.
