වසර 4කට පසු මෙල්බන්හි වාර්තාගත වර්ෂාපතනයක් අප්‍රේල් මාසය ආරම්භයත් සමග සටහන් වූ බව කාළගුණ විද්‍යා කාර්යාංශය පවසනවා.
වික්ටෝරියා ප්‍රාන්තයට පැවති සුළි කුණාටු තත්වය හේතුවෙන් ප්‍රාන්තය පුරා වර්ෂාධික කාළගුණයක් පැවති බවයි වාර්තා වන්නේ.
දැඩි නියඟයත් සමග පසුගිය මාසය පුරා වික්ටෝරියා ප්‍රාන්තයට ලැබී තිබුණේ මිලිමීටර් 2.8 ක් වැනි සුලු වර්ෂාපතනයක් පමණයි.
ගතවූ පැය විසි හතරක කාලසීමාව තුල මෙල්බන් නගරයට මිලිමීටර 53.2ක වර්ෂාපතනයක් ලැබී ඇති අතර දැඩි වර්ෂාවත් සමග වික්ටෝරියා ප්‍රාන්තයේ අකුණු 170,205 ක් පමණ වාර්තා වී තිබෙනවා.
ඉදිරි දින කිහිපය තුළ ද ප්‍රාන්තය පුරා සැළකිය යුතු වර්ෂාවක් තවදුරටත් අපේක්ෂා කරන අතර හදිසි ගංවතුර ඇති විය හැකි බවටයි කාළගුණ විද්‍යා කාර්යාංශය අනතුරු ඇඟවීමක් සිදු කර ඇත්තේ.
මින් වැඩිම බලපෑමක් මෙල්බන් අගනුවරට සිදුවී ඇති අතර ජලයෙන් යටවිය හැකි මාර්ග හැකිතාක් මගහරින ලෙස බලධාරීන් ජනතාව දැනුවත් කර තිබෙනවා.
