බරපතළ වැඩ සහිත වසර හතරක සිර දඬුවම් නියම වී සිටින ගලගොඩඅත්තේ ඥානසාර හිමි ඇප මත මුදාහරින ලෙස කර තිබූ ඉල්ලීම කොළඹ මහාධිකරණය විසින් ප්‍රතික්ෂේප කර තිබෙනවා.
ඥානසාර හිමිට සිරදඬුවම් නියම කළ කොළඹ මහාධිකරණ විනිසුරු ආදිත්‍ය පටබැඳිගේ මහතා විසිනුයි ඊයේ මෙම තීන්දුව ලබා දී ඇත්තේ.
වසර හතරක සිර දඬුවමට එරෙහිව අභියාචනයක් ඉදිරිපත් කර ඇති බැවින් විත්තිකරු ඇප මත නිදහස කරන ලෙස ඉල්ලමින් නීතිඥවරුන් විසින් මෙම ඇප ඉල්ලීම ඉදිරිපත් කර තිබුණා.
කොළඹ මහාධිකරණ විනිසුරු ආදිත්‍ය පටබැඳිගේ විසින් පසුගියදා ගලබොඩ අත්තේ ඥානසාර හිමිට වසර 4ක බරපතළ වැඩ සහිත සිරදඬුවම් නියම කරනු ලැබුවේ නීතිපතිවරයා විසින් පනවා තිබූ නඩුවක අධි චෝදනා දෙකටම වරදකරු කරමින්.
2016 වසරේ කොළඹදී පැවැති ප්‍රසිද්ධ මාධ්‍ය හමුවකදී කූරගල විහාරස්ථානය සම්බන්ධයෙන් සිදු කළ ප්‍රකාශය මගින් ජාතික හා ආගමික සංහිඳියාවට හානි සිදු කළ බවට වන චෝදනා මත මෙම නඩුව ගොනු කර තිබුණා.
