මොස්කව් නුවර සංගීත ප්‍රසංගයක් පැවති ශාලාවකට වෙඩි ප්‍රහාරයක් එල්ල කිරීමට සම්බන්ධ තුවක්කුකරුවන් සිව්දෙනාම අත්අඩංගුවට ගත් බව රුසියානු ජනාධිපති ව්ලැඩිමීර් පුටින් පවසනවා.
ප්‍රහාරකයින්ගේ වෙඩි තැබීමෙන් පුද්ගලයින් 133 දෙනෙකු මිය ගිය අතර 140 කට වැඩි පිරිසක් තුවාල ලබා ඇති බවටයි අනාවරණ වී ඇත්තේ.
රුසියානු බලධාරීන් පැවසුවේ ප්‍රහාරයට සම්බන්ධව පුද්ගලයන් 11 දෙනෙකු අත්අඩංගුවට ගෙන ඇති අතර තුවක්කුකරුවන් හතර දෙනා යුක්රේනය බලා යමින් සිටියදී අල්ලා ගත් බවයි.
වෙඩි තැබීම ආරම්භ වන විට රොක් සංගීත ප්‍රසංගයක් සඳහා 6,200ක පමණ පිරිසක් ශාලාවේ රැස්ව සිටි බව සඳහන්.
මෙම ප්‍රහාරය පිටුපස සිටින්නේ තමන් බවට IS කණ්ඩායම ප්‍රකාශ කර ඇති අතර ඒ සම්බන්ධයෙන් රුසියාව මෙතෙක් අදහස් දක්වා නැහැ.
රූපවාහිනී දේශනයකදී රුසියානු ජනාධිපතිවරයා පැවසුවේ වසර 20කට ආසන්න කාලයක් තුළ එල්ල වූ මාරාන්තිකම ප්‍රහාරය ම්ලේච්ඡ ත්‍රස්තවාදී ක්‍රියාවක් ලෙස හෙළා දකින බවයි.
ප්‍රහාරකයන් යුක්රේනයට පැන යාමට උත්සාහ කළ බවට රුසියානු ආරක්ෂක අංශ විසින් කළ ප්‍රකාශය යුක්රේනය විසින් ප්‍රතික්ෂේප කර ඇත්තේ ප්‍රහාරයට තමන් සම්බන්ධ කිරීමට උත්සහ කිරීමක් ලෙසට පෙන්වා දෙමින්.
ප්‍රහාරය සම්බන්ධයෙන් යුක්රේනයට දොස් පැවරීමට පුටින් උත්සාහ කරන බවට යුක්රේන ජනාධිපති ව්ලැද්මීර් සෙලෙන්ස්කි (Volodymyr Zelensky) චෝදනා කරනවා.
මේ අතර එක්සත් ජනපද ජාතික ආරක්ෂක කවුන්සිලය ප්‍රකාශ කළේ මේ මස මුල මොස්කව්හි ප්‍රසංග ඇතුළු විශාල රැස්වීම් වෙත ප්‍රහාරයක් එල්ල විය හැකි බවට රුසියාවට තමන් අනතුරු ඇඟ වූ බවයි.
