ඔස්ට්‍රේලියාවේ නිව් සව්ත් වේල්ස් ප්‍රාන්තය පමණක් දේපළ වෙළදාමේ දී මුද්දර ගාස්තු ඉවත් කළහොත් සෑම වසරකම ඔස්ට්‍රේලියානුවන් ලක්ෂයකට පමණ නිවාස මාරු කිරීමට සිදුවන බවට ඇස්තමේන්තු ගත කර තිබෙනවා.
ඔස්ට්‍රේලියාවේ නිවසක් මිලදී ගැනීමේදී නිවස සඳහා ලබා දෙන මුදලින් මුද්දර ගාස්තුව ස්වයංක්‍රියව අඩු වීමයි සාමාන්‍ය ක්‍රමවේදය වන්නේ.
බොහෝ දෙනෙකු පෙන්වා දෙන්නේ මුද්දර ගාස්තු අගය නොදැන සිටීම හේතුවෙන් අදාළ ගාස්තු පිළිබඳ ඔස්ට්‍රේලියානුවන් එතරම් තැකීමක් සිදු නොකරන බවයි.
මුද්දර ගාස්තු නොමැතිව නිවෙසක් කොපමණ ලාභදායි ද යන්න පිළිබඳ බොහෝ දෙනෙකුගේ අවධානය යොමුව තිබෙනවා.
අවසන් වරට 2010 වසරේ සිදු කළ බදු සමාලෝචනයකට අනුව ප්‍රාන්තයෙන් ප්‍රාන්තයට දේපළ වෙලඳාමේ දී අයවන මුද්දර ගාස්තු අසමාන බව ප්‍රකාශ කර තිබුණා.
මුද්දර ගාස්තු දේපළ තක්සේරුවකට සාපේක්ෂව ජනතාව පිට පැවරෙන අමතර බද්දක් ලෙස සැලකෙන අතර ක්වීන්ස්ලන්ඩ් ප්‍රාන්තයේ පමණක් මුද්දර ගාස්තුව සියයට 1.26 සිට සියයට 2.27 දක්වා ඉහළ ගොස් තිබුණා.
නිව් සවුත් වේල්ස් ප්‍රාන්තයේ මුද්දර ගාස්තු දේපල වටිනාකමින් සියයය 3.5ක අගයක් ගන්නා අතර නිවාස හිමියන් විසින් වැඩි අගයක් ඒ සඳහා අයකරගන්නා බවට චෝදනා මතුව තිබෙනවා.
එසේම වික්ටෝරියා ප්‍රාන්තයේ මුද්දර ගාස්තු අනුපාතය සියයට 4.2ක් වන අතර එම අගය ඉවත් කළහොත් තමන්ගේම නිවසක් මිලදී ගන්නා වික්ටෝරියානුවන් සංඛ්‍යාව සියයට 30 දක්වා ඉහළ යනු ඇති බව සඳහන්.
දේපල වෙළඳාමේ දී නිවාස පමණක් නොව වාහන වෙළඳාමෙහිද අසාමාන්‍ය මුද්දර ගාස්තු හේතුවෙන් පීඩා විඳින ඔස්ට්‍රේලියානුවන්ට යම් සහනයක් අවශ්‍ය බවටයි විවිධ පාර්ශව රජයෙන් ඉල්ලා සිටින්නේ.
