සෑම ඔස්ට්‍රේලියානු පස් දෙනෙකුගෙන් තිදෙනෙක් මූල්‍ය ආතතියෙන් පසුවන බව ෆයින්ඩර් නවතම අධ්‍යයනයක දී හෙළිව තිබෙනවා.
ඒ අනුව මූල්‍ය පීඩනය යටතේ සිටින සමස්ත ඔස්ට්‍රේලියානුවන් ගණන මිලියන 11.9ක් බවයි වාර්තා වන්නේ.
ස්ත්‍රී පුරුෂ සමාජභාවට අනුව කාන්තාවන්ගෙන් සියයට 69ක් සහ පිරිමි පුද්ගලයින්ගෙන් සියයට 49ක් මෙලෙස මුල්‍ය ආතතියෙන් පසුවන බව සඳහන්.
වයස අවුරුදු 27ට අඩු තරුණ ඔස්ට්‍රේලියානුවන් මෙලෙස මූල්‍ය ආතතියට ගොදුරු වූ ඉහළම කාණ්ඩය ලෙස නම් කර ඇති අතර එම අගය සටහන්ව ඇත්තේ සියයට 77ක් ලෙසයි.
ෆයින්ඩර් හි මුදල් විශේෂඥ රෙබෙකා පයික් සඳහන් කළේ ජීවන අර්බුධය හමුවේ මිලියන සංඛ්‍යාත පවුල් ඒකක මූල්‍ය පීඩනය අත්විදින බවයි.
මූල්‍ය ආතතිය ඔස්ට්‍රේලියානුවන්ගේ මානසික සෞඛ්‍යයට විනාශකාරී බලපෑමක් ඇති කළ හැකි අතර ඔස්ට්‍රේලියානුවන්ගෙන් අඩකට වඩා එනම් සියයට 53ක් මෙලෙස දැඩි ආතතියෙන් පසුවන බව හෙළිවී තිබෙනවා.
සමීක්ෂණයට සහභාගිවුවන්ගෙන් වැඩි පිරිසක් සඳහන් කර ඇත්තේ තම අවශ්‍යතාවලින් වැඩි ප්‍රමණායක් කප්පාදු කිරීමට සිදුව ඇති අතර මූල්‍ය ආතතිය හේතුවෙන් ජීවිතයේ වටිනා අවස්ථා රැසක් මගහැර ඇති බවයි.
රෙබෙකා පයික් ඔස්ට්‍රේලියානුවන්ගෙන් ඉල්ලා සිටියේ ඔවුන්ගේ ඉතුරුම් ඉහළ නැංවීමට සහ වියදම් කපා හැරිය හැකි ක්ෂේත්‍ර හඳුනා ගැනීමට කටයුතු කිරීමෙන් මුල්‍ය ආතතිය සදහා යම් සහනයක් ලබා ගත හැකි බවයි.
