ඔස්ට්‍රේලියාවේ පිටත තදාසන්න ප්‍රදේශවල පසුගිය වසරේ විදුලි මෝටර් රථ අලෙවිය අභ්‍යන්තර නගර අභිබවා ගොස් තිබෙනවා.
විදුලි මෝටර් රථ අලෙවි ආයතන පවසන්නේ ඉහළ පෙට්‍රල් මිල වැනි ජීවන වියදම් පීඩනය මෙම ප්‍රවණතාවයට හේතු වී ඇති බවයි.
ඔස්ට්‍රේලියාවේ විද්‍යුත් මෝටර් රථ අලෙවිය ලෝකයේ සෙසු රටවලට වඩා පසුගාමී වුව ද ලාභදායී මාදිලි සහ සූර්ය බලශක්ති ව්‍යාපෘති මගින් ඉදිරි වසරවලදී එම පරතරය අඩු වනු ඇති බවටයි අපේක්ෂා කෙරෙන්නේ.
විද්‍යුත් වාහන කවුන්සිලයේ නවතම දත්ත පෙන්නුම් කර ඇත්තේ පසුගිය වසරේ ජනප්‍රිය විදුලි වාහන සන්නාමයන් සඳහා වූ ඇණවුම්වල විශාලතම වැඩිවීම උප නගර ප්‍රදේශවලින් වාර්තා වන බවයි.
සියලුම විද්‍යුත් වාහන අලෙවියෙන් හතරෙන් තුනක් සඳහා හිමිකාරිත්වය දරනු ලබන්නේ විශාලතම විදුලි මෝටර් රථ සමාගම් දෙක වන ටෙස්ලා සහ චීනයට අයත් බී වයි ඩී ඔටෝ සමාගම් විසින්.
සමස්තයක් වශයෙන්, පසුගිය වසරේ මෙම මෝටර් රථ සමාගම් විසින් අලෙවි කරන ලද විද්‍යුත් මෝටර් රථවලින් සියයට 43ක් පමණ ගොස් ඇත්තේ පිටත නගර තදාසන්න ප්‍රදේශවල සිටින පුද්ගලයින් වෙතයි.
අභ්‍යන්තර නාගරික ප්‍රදේශවල එම මෝටර් රථ අලෙවිය දැක්වෙන්නේ සියයට 39ක් ලෙසින්.
මෝටර් රථ ප්‍රවීණයන් පෙන්වා දෙන්නේ පෙට්‍රල් මිල ඉහළ යාම වැඩි පිරිසක් විදුලි මෝටර් රථවලට මාරු වීමට හේතුව වී ඇති අතර සූර්ය බලශක්තිය හිමි ඉහළ අනුපාත සහ තදාසන්න ප්‍රදේශවල වීථියෙන් පිටත වාහන නැවැත්වීමේ හැකියාව ද මෙම ප්‍රවණතාවයට හේතු වන්නට ඇති බවටයි.
ෆෙඩරල් ඔටෝමෝටිව් ඉන්ඩස්ට්‍රීස් දත්තවලට අනුව පසුගිය මාසයේ ඔස්ට්‍රේලියාවේ අලෙවි වූ නව මෝටර් රථවලින් සියයට 9.6ක් විද්‍යුත් වාහන බව ද සඳහන්.
