ජනප්‍රිය ඇඳුම් සන්නාමයක් වන Black Milk Clothing හි නිර්මාතෘ සහ ප්‍රධාන විධායක නිලධාරී ජේම්ස් ලිලිස් (James Lillis) නිවාඩුවක් ගත කරමින් සිටියදී හදිසි අනතුරකින් මිය ගොස් ඇතැයි එම සමාගම පවසනවා.
JL නමින් හැඳින්වෙන ජේම්ස් ලිලිස් පසුගියදා හදිසි අනතුරකදී තුවාල ලබා ඇති අතර ප්‍රතිකාර ලබමින් සිටියදී මියගොස් ඇති බවයි එම සමාගම සඳහන් කර ඇත්තේ.
ලිලීස් 2009 වසරේ දී ඇඳුම් නිර්මාණ කටයුතු ආරම්භ කළ අතර අන්තර්ජාලය හරහා ඒවා අලෙවි කිරීමෙන් ජනප්‍රියත්වයට පත්වීමත් සමග Black Milk ඇඳුම් සමාගම ආරම්භ කරනු ලැබුවා.
අනතුරුව ගතවූ දශකය තුළ සමාගම ක්‍රමානුකූලව ගනුදෙනුකරුවන්ගේ පදනමක් ගොඩනඟා ගත් අතර මේ වන විට දහස් ගණනක් වූ ගනුදෙනුකරුවන් මෙන්ම අන්තර්ජාලය හරහා මිලියනයකට අධික රසිකයන් පිරිසක් ද රැස් කරගෙන සිටිනවා.
ලිලීස්ට ගෞරව කිරීම සඳහා Black Milk ඇඳුමින් සැරසී සිටින ඡායාරූප පළ කරන ලෙසටයි සමාගම සිය පාරිභෝගිකයින්ගෙන් ඉල්ලා ඇත්තේ.
Black Milk යනු ක්වීන්ස්ලන්ඩ් ප්‍රාන්තය පදනම් කරගත් ඔන්ලයින් ඇඳුම් සන්නාමයක් වන අතර එය විකල්ප විලාසිතාවල ඇඳුම් අලෙවි කරනු ලබනවා.
