රුසියානු විපක්ෂ නායක ඇලෙක්සි නවාල්නිගේ දේහය රහසිගතව භූමදානය කිරීම සඳහා එකඟ වන ලෙසට රුසියානු බලධාරීන් ඔහුගේ මවට පැය තුනක කාලයක් ලබා දී ඇති බව අනාවරණ වී තිබෙනවා.
අභාවප්‍රාප්ත නවාල්නිගේ ප්‍රකාශකයා පැවසුවේ රුසියානු බලධාරීන් ඔහුගේ මව වන ලියුඩ්මිලාට මේ සම්බන්ධයෙන් අවසන් නිවේදනයක් ලබා දුන් බවයි.
අභාවප්‍රාප්ත ඇලෙක්සි නවාල්නිගේ දේහය පොදු අවමංගල්‍යයක් නොපවත්වා අවසන් කිරීමට පැය තුනක් ඇතුළත එකඟ නොවන්නේ නම් ඔහු මියගිය දණ්ඩ ජනපදයේ මිහිදන් කරන බව රුසියානු බලධාරීන් ඔහුගේ මවට ප්‍රකාශ කර තිබෙනවා.
විපක්ෂ නායකවරයාගේ මව වන 69 හැවිරිදි ලියුඩ්මිලා, ඔහුගේ මිතුරන්, පවුලේ අය සහ ආධාරකරුවන්ට ගෞරව දැක්වීමට ඉඩ සලසන ආකාරයෙන් දේහය භූමදාන කිරීමට ලබාදෙන ලෙස දින ගණනාවක් තිස්සේ ඉල්ලීම් කරමින් සිටිනවා
එහෙත් සිකුරාදා, නවාල්නිගේ ප්‍රකාශකයා සඳහන් කළේ විමර්ශකයෙකු මව අමතා ඇයට අවසාන නිවේදනයක් ලබා දුන් බවයි.
කෙසේවෙතත් නවාල්නිගේ මව මෙම යෝජනා ප්‍රතික්ෂේප කරන අතර පුත්‍රයාගේ සිරුර තමාට භාර දෙන ලෙස දිගින් දිගටම ඉල්ලීම් කරන බවත් සඳහන්.
රුසියානු ජනාධිපති ව්ලැඩිමීර් පුටින් විසින් නවාල්නි ඝාතනය කළ බවට පවුලේ අය සහ ආධාරකරුවන් චෝදනා කළ අතර ක්‍රෙම්ලිනය එය ප්‍රතික්ෂේප කර තිබෙනවා.
මේ අතර නවාල්නිගේ මරණය සම්බන්ධයෙන් ඇමරිකා එක්සත් ජනපදය රුසියානු නිලධාරීන් තිදෙනෙකුට සම්බාධක ද පනවා ඇති අතර, තවත් ක්‍රියාමාර්ග ගැනීමට බලාපොරොත්තු වන බවයි අවධාරණය කළේ.
