ඔස්ට්‍රේලියාවේ සේවක වැටුප් වැඩිවීම වසර ගණනාවකට පසු පළමු වරට උද්ධමනය අභිබවා ගොස් තිබෙනවා.
2021 වසරෙන් පසු පළමු වතාවටයි වාර්ෂික උද්ධමන අනුපාතයට වඩා ඔස්ට්‍රේලියානුවන්ට වැටුප් වැඩි වීම සිදුවී ඇත්තේ.
ඔස්ට්‍රේලියා සංඛ්‍යාලේඛන කාර්යාංශයේ නව දත්තවලට අනුව, දෙසැම්බර් සිට මාස 12 තුළ වැටුප් දර්ශකය සියයට 4.2 කින් ඉහළ ගොස් ඇති අතර, පාරිභෝගික මිල දර්ශකයට වඩා 4.1ක ප්‍රතිශතයක් ඉදිරියෙන් පසුවන බව සඳහන්.
2021 වසරේ මාර්තු මාසයෙන් පසු වාර්ෂික වැටුප් වර්ධනය උද්ධමනය අභිබවා ගිය පළමු අවස්ථාව මෙය වන අතර, වසර 14කට ආසන්න කාලයකදී වැටුප්වල ඉහළම වාර්ෂික වැඩි කිරීම ද මෙය වනවා.
රාජ්‍ය සහ පෞද්ගලික යන දෙඅංශයේම වැටුප් වර්ධන සමාලෝචනය කරමින් මේ පිළිබද වාර්තා ඉදිරිපත්ව ඇති බවයි වාර්තා වන්නේ.
විශේෂයෙන් රාජ්‍ය අංශයේ ඇතැම් රැකියා සදහා ඉහළ වැටුප් පෙන්නුම් කර ඇති අතර මූලික වශයෙන් ඊට හේතු ලෙස සදහන් කර ඇත්තේ සෞඛ්‍ය සේවා, සමාජ ආරක්ෂණ, අධ්‍යාපන හා පුහුණු කර්මාන්තවල අත්‍යවශ්‍ය සේවකයින් සඳහා අලුතින් ක්‍රියාත්මක කරන ලද නව ව්‍යවස්ථාපිත ගිවිසුම් හේතු වූ බවයි.
