මුල්‍ය වංචාවක් සම්බන්ධයෙන් අධිකරණයක් විසින් ඩොලර් මිලියන 355ක දඩයක් නියම කිරීමෙන් පසු ඇමරිකාවේ හිටපු ජනාධිපති ඩොනල්ඩ් ට්‍රම්ප් තමන්ගේම සන්නාමයේ සපත්තු අලෙවියට යොමුවී තිබෙනවා.
ඩොනල්ඩ් ට්‍රම්ප් ෆිලඩෙල්ෆියා හි ස්නීකර් ලෝලීන් සඳහා වන සමුළුවක් අතර ට්‍රම්ප් සන්නාමය සහිත ඔහුගේම සපත්තු පෙළක් ඉදිරිපත් කර ඇති බවයි විදෙස් මාධ්‍ය සඳහන් කළේ.
ඩොලර් 399ක මුදලකට අන්තර්ජාලය හරහා අලෙවි කරනු ලබන රන් පැහැති සපත්තු යුගලයක් ඔහු සමුළුවේදී ඉදිරිපත් කර තිබෙනවා.
ට්‍රම්ප් පැවසුවේ මෙය තම වසර 12 ක්, තිස්සේ බලාපොරොත්තුවෙන් සිටි දෙයක් වන අතර එය විශාල සාර්ථකත්වයක් ලැබෙනු ඇතැයි අපේක්ෂා කරන බවයි.
ණය මුදලක් ලබා ගැනීම සඳහා තම දේපළවල වටිනාකම් ගැන අසත්‍ය ප්‍රකාශ සිදු කිරීමේ චෝදනා හේතුවෙනුයි හිටපු ජනාධිපතිවරයාට ඩොලර් මිලියන 355කට ආසන්න දඩ මුදලක් ගෙවන ලෙස විනිසුරුවරයෙකු නියෝග කරනු ලැබුවේ.
කෙසේවෙතත් අධිකරණය ට්‍රම්ප්ගේ ව්‍යාපාරික බලපත්‍ර අවලංගු කර නොමැති අතර ඇතැමුන් ප්‍රකාශ කර ඇත්තේ හිටපු ජනාධිපතිවරයාගේ ව්‍යාපාරික අධිරාජ්‍යය අවසන් කළ හැකිව තිබූ අවස්ථාවක් ගිලිහි ගිය බවයි.
එළඹෙන නොවැම්බර් මාසයේ පැවැත්වෙන ඇමෙරිකානු ජනාධිපතිවරණයේදී ට්‍රම්ප් රිපබ්ලිකන් අපේක්ෂකයා වනු ඇතැයි බොහෝ දෙනා අපේක්ෂා කරනවා.
