ටේලර් ස්විෆ්ට්ගේ ඔස්ට්‍රේලියා සංචාරයේ මෙල්බර්න් ප්‍රසංගය වාර්තාගත රසික සහභාගීත්වයක් සමගින් ඉතාමත් උත්කර්ෂවත් ආකාරයෙන් පවත්වා තිබෙනවා.
පසුගියදා තම පුද්ගලික ජෙට් යානයෙන් මෙල්බර්න් වෙත පැමිණි ටේලර් ස්විෆ්ට්ගේ සංගීත ප්‍රසංගය නැරඹීම වෙනුවෙන් තරුණ රසික රසිකාවියින් ඩොලර් දහස් ගණනක් වියදම් කර ඇති බවටයි අනාවරණ වූයේ.
ටේලර් ස්විෆ්ට් රසිකයන් රැසක් අවසන් මොහොතේ මුදල් ගෙවා ලබා ගෙන තිබූ ප්‍රවේශපත්‍ර වංචනික ඒවා බවට ද හෙළිවීම හේතුවෙන් දැඩි කළකිරීමකට පත්ව සිටි බව සඳහන්.
ඇතැමුන් නොදැනුවත්ව ම විවිධ පුද්ගලයන් විසින් අන්තර්ජාලය ඔස්සේ සොරකම් කළ ප්‍රවේශපත්‍ර ලබාගෙන ප්‍රසංගයට පැමිණ අපහසුතාවන්ට ලක්ව තිබුණා.
Taylor Swiftගේ ප්‍රසංගයකට පැමිණි විශාලතම රසික සහභාගීත්වය මෙල්බර්න් නුවරින් වාර්තා කරමින් එය පැවති මෙල්බර්න් ක්‍රිකට් ක්‍රීඩාංගන භුමියට පමණක් පැමිණ සිටි පුද්ගලයින් සංඛ්‍යාව 96,000ක් බවටයි තහවුරු වී ඇත්තේ.
මෙල්බර්න් හි රාත්‍රී තුනක් පුරා පැවැත්වෙන ප්‍රසංගයට ප්‍රේක්ෂකයින් 260,000ක් පමණ පැමිණෙනු ඇතැයි අපේක්ෂා කරන අතර ටිකට්පත් ගැටළු ඇති පුද්ගලයින්ට උපකාර කිරීම සඳහා පැය 24 පුරා සේවා ක්‍රියාත්මකයි.
එමෙන්ම මෙල්බර්න් ක්‍රීඩාංගණය ට පැමිණෙන රසිකයන්ට අමතර දුම්රිය සහ බස් රථ සේවා ද යොදවා තිබෙනවා.
අවස්ථා 14 කදී ග්‍රැමී සම්මානලාභී Taylor Swift පෙබරවාරි 23 වනදා සිට 26 දක්වා සිඩ්නි හි සංදර්ශන හතරක් ද පැවැත්වීමට නියමිතයි.
