සිඩ්නි නුවර ප්‍රධාන උමං මාර්ගයකදී ගැබිනි කාන්තාවක් සහ ඇගේ සැමියා ගමන් ගත් මෝටර් රථය ගිනිගෙන විනාශ වී තිබෙනවා.
බ්‍රහස්පතින්දා දහවල් 12ට පමණ ආරම්භ වූ ගින්න හේතුවෙන් සිඩ්නි වරාය උමං මාර්ගයේ සහ නැගෙනහිර මාර්ගයේ මංතීරු වසා දැමීමටයි බලධාරීන් පියවර ගෙන ඇත්තේ.
මෙම අනතුර සමග මාර්ගයේ ගමනාගමනය ඇණහිට ඇති අතර, බොහෝ දෙනෙකු තම මෝටර් රථ නතර කර දමා එම ස්ථානයට පා ගමනින් ගොස් තිබුණා.
කෙසේවෙතත් මෙම අනතුරින් අඹුසැමි යුවළට කිසිදු අනතුරක් හෝ හානියක් සිදුවී නොමැති බව සඳහන්.
අනතුරින් පසු සැමියා ප්‍රකාශ කළේ මෝටර් රථය ගිනි ගන්නා බව දැනුනු වහාම ගැබිනි බිරිඳ ආරක්ෂිත ස්ථානයකට ගෙන යාම සඳහා රථයෙන් ඉවත් වී අසල තිබූ ගිනි නිවීමේ ට්‍රක් රථයක් වෙත දිව ගිය බවයි.
අනතුර වාර්තා වීමත් සමග නිව් සවුත්වේල්ස් ප්‍රාන්තයේ ගිලන්රථ කාර්ය මණ්ඩලය කිහිප දෙනෙකු ද එම ස්ථානයට පැමිණ සිටියා.
ඔවුන් විසින් පොලිස් නිලධාරියෙකු ඇතුළු සිව් දෙනෙකුට එම ස්ථානයේදීම ප්‍රතිකාර ලබා දී ඇති අතර එක් කාන්තාවක් සෙන්ට් වින්සන්ට් රෝහලට ගෙන ගොස් තිබෙනවා.
