ඕස්ට්‍රේලියාව සංක්‍රමණිකයන් බඳවා ගැනීම අඩකින් අඩු කිරීමට සහ ශිෂ්‍ය වීසා නීති දැඩි කිරීමට සැලසුම් කර තිබෙනවා.
ජාත්‍යන්තර සිසුන් සහ අඩු පුහුණු ශ්‍රමිකයින් සඳහා වීසා නීති දැඩි කිරීමට තීරණය කර ඇති අතර එමඟින් ඉදිරි වසර දෙක තුළ සංක්‍රමණිකයන් බඳවා ගැනීම අඩකින් අඩු කළ හැකි බවටයි ඕස්ට්‍රේලියා බලධාරීන් තීරණය කර ඇත්තේ.
රජය සංක්‍රමණ ප්‍රතිපත්ති ප්‍රතිසංස්කරණය කිරීමට බලාපොරොත්තු වීම හමුවේ මෙම පියවර ගෙන ඇති බව සඳහන්.
නව ප්‍රතිපත්ති යටතේ, ජාත්‍යන්තර සිසුන්ට ඉංග්‍රීසි පරීක්ෂණ සඳහා ඉහළ ලකුණු ලබා ගැනීමට අවශ්‍ය වන අතර වීසා අයදුම්පත්‍රයේ වැඩි පරීක්ෂාවක් ද සිදු කෙරෙනු ඇති.
මෙම උපාය මාර්ග තුලින් සංක්‍රමණිකයන් සංඛ්‍යාව සාමාන්‍ය තත්ත්වයට පත්වනු ඇති බවටයි ස්වදේශ කටයුතු අමාත්‍ය ක්ලෙයාර් ඕ’නීල් මාධ්‍ය හමුවකදී ප්‍රකාශ කළේ.
අගමැති ඇන්තනි ඇල්බනීස් ද පසුගියදා ප්‍රකාශ කළේ ඕස්ට්‍රේලියාවේ සංක්‍රමණ සංඛ්‍යාව ස්ථාවර මට්ටමකට ආපසු ගෙන යා යුතු අතර එම පද්ධතිය මේ වන විට බිඳ වැටී ඇති බවයි.
COVID වසංගතය හමුවේ පැවති දැඩි දේශසීමා පාලනයන් ගෙන් පසු ව්‍යාපාරවල පුරප්පාඩු පිරවීම සඳහා කාර්ය මණ්ඩලය බඳවා ගැනීමට ඕස්ට්‍රේලියාව 2023 වසරේ වාර්ෂික සංක්‍රමණ සංඛ්‍යාව ඉහළ නංවනු ලැබුවා.
එහෙත් විදේශ ශ්‍රමිකයන්ගේ සහ ශිෂ්‍යයන්ගේ හදිසි ආගමනය හමුවේ රට තුළ නිවාස නොමැති ගැටලුව සමඟ දැනටමත් කුලී නිවාස මත තරගකාරී වෙලඳපොලක් ද නිර්මාණය වී තිබෙනවා.
