වික්ටෝරියා ප්‍රාන්තයේ සංයුක්ත ගොඩනැගිලි ඉදිකලහොත් 2056 වසර වනවිට ඩොලර් බිලියන 43 ක ප්‍රතිලාභ අත්කර ගැනීමේ හැකියාව පවතින බව නවතම වාර්තාවකින් අනාවරණය වී තිබෙනවා.
ඒ අනුව සංයුක්ත ගොඩනැගිලි බිහිකරමින් පරිසර හිතකාමි පරිසරයක් ඇති කිරීමයි ප්‍රාන්ත රජයේ අරමුණ වී ඇත්තේ.
ඵලදායිතාව ඉහළ නැංවීම මෙන්ම ඉහළ යන නිවාස මිළ ගණන් හා රැකියා සදහා ප්‍රවේශවීමට වැඩි ඉඩක් වෙන් කිරීමට සංයුක්ත ගොඩනැගිලි මගින් වැඩි අවස්ථාවක් හිමිවනු ඇති.
විචාරකයින් පෙන්වා දෙන්නේ 2056 වසර වන විට වික්ටෝරියා ප්‍රාන්තයේ වෙසෙන මිලියන 11 කට අධික ජනතාවගේ ආර්ථික තත්ත්වය ඉහළ නංවමින්, ශක්තිමත් ආර්ථිකයක් සහ තිරසාර පරිසරයක් අත්කර ගැනිමට යෝජිත වැඩපිළිවෙල මගින් අවස්ථාවක් උදාවනු ඇති බවයි.
සංයුක්ත නගර සංකල්පයේදී වාහන ගමනාගමනයේ දී සිදුවන අහිතකර වායු විමෝචන ටොන් මිලියන 17.3 කින් අඩු කර ගැනීමට හැකිවීම ද විශේෂත්වයක්.
මේ අතර යටිතල පහසුකම් උපරිම වන අයුරින් ඉදිරි වසර 10 සදහා වසරකට නව නිවාස 80,000 ක් වික්ටෝරියා ප්‍රාන්තයේ ඉදිකිරීම අරමුණු වන අතර මෙල්බන්හි හඳුනාගත් ප්‍රදේශ 10 ක් යටතේ නව නිවාස 60,000 ක් ඉදි කිරීමට ද නියමිතයි.
