කෘත්‍රීම බුද්ධිය අවභාවිතයට ඉඩ සළසන සහ වර්ගවාදී අදහස් ප්‍රචාරයට අනුබල දෙන සමාජ මාධ්‍ය ජාල සඳහා ඩොලර් 787,000 ක දඩ පැණවෙන නව නීති හඳුන්වාදීමට ෆෙඩරල් රජය සූදානම් වනවා.
විශේෂයෙන් ළමුන් ඇතුලු සමස්ත මහජන ආරක්ෂාව සළකා ඔන්ලයින් ආරක්ෂා පණතට මෙම සංශෝධන හඳුන්වා දෙන බවයි සන්නිවේදන විශය භාර ඇමතිනී මිචෙල් රෝලන්ඩ් සඳහන් කලේ.
කෘත්‍රීම බුද්ධි තාක්ෂණය යොදා සකස් කරන ලද විකෘතිමය ඡායාරූප සහ වීඩියෝ වහා සමාජ මාධ්‍යයෙන් ඉවත් කිරීමද මෙහිදී සිදුවනු ඇති.
මේ සඳහා සන්නිවේදන සමාගම් විසින් උපරිම සහය පළකල යුතු අතර ඒ සඳහා අපොහොසත් වන්නේ නම් ඔවුන්ට එරෙහිවද දැඩි පියවර ගැනීමට නියමිතයි.
ළමුන්ගේ ආරක්ෂාව වෙනුවෙන් සයිබර් අවකාශය තුළ ප්‍රමාණවත් නීති නොමැති බවට පාර්ශව රැසක් විසින් ෆෙඩරල් රජයට දිගින් දිගටම කල චෝදනා සඳහා ප්‍රතිචාර දක්වමිනුයි මෙම පියවර ගෙන ඇත්තේ.
මෑතක සිට කෘත්‍රීම බුද්ධිය තාක්ෂණය අතිශය ජනප්‍රියවීමත් සමග විවිධ අසභ්‍ය දෑ නිර්මාණයට කුඩා ළමුන් සහ ජනප්‍රිය චරිතවල ඡායාරූප යොදා ගැනීම ඉහළ අගයක් ගැනීමද මෙම නව නීති සඳහා හේතු වී තිබෙනවා.
