06 වන වරටත් එක්දින ක්‍රිකට් ලෝක කුසලානය තමන් සතු කර ගැනීමට ඔස්ට්‍රේලියාව සමත් වුණා.
ඒ අහමදාබාද් නුවර නරේන්ද්‍ර මෝදි ක්‍රීඩාංගණයේ ඊයේ (19) පැවති අවසාන මහා තරගයේදී ප්‍රතිවාදී ඉන්දීය කණ්ඩායම කඩුලු 06 කින් පරාජයට පත්කරමිනුයි.
මීට පෙර 1987, 1999, 2003, 2007 සහ 2015 වර්ෂවලදී ඔස්ට්‍රේලියාව ලෝක කුසලාන හිමිකරගෙන තිබුණා.
ප්‍රථමයෙන් පන්දුවට පහරදුන් ඉන්දීය කණ්ඩායම නියමිත පන්දුවාර 50 අවසානයේ සියලූදෙනා දැවී ලකුණු 240 ක් රැස්කර ගත්තා.
කේ එල් රාහුල් ළකුණු 66 ක් ද / විරාත් කෝලි ලකුණු 54 ක් ද / නායක රෝහිත් ශර්මා ළකුණු 47 ක් ද රැස්කරගත්තා.
මිචෙල් ස්ටාක් කඩුලූ 03 ක් ද / පැට් කමින්ස් සහ ජොෂ් හෙස්ල්වුඩ් කඩුලූ 02 බැගින්ද බිඳහෙලුවා.
තරගයේ ප්‍රථමයෙන් පන්දුවට පහරදුන් ඉන්දීය කණ්ඩායම ලබාදුන් ලකුණු 241 ක ඉලක්කය ඔස්ට්‍රේලියාව පන්දුවාර 43 කදී කඩුලූ 4 ක් පමණක් දැවී සපුරාගනු ලැබුවා.
එහිදී අගනා ඉනිමක් ක්‍රීඩා කළ ඔස්ට්‍රේලියා පිතිකරු ට්‍රැවිස් හෙඩ් ළකුණු 137 ක් රැස්කරමින් ඔස්ට්‍රේලියා කණ්ඩායම වෙත ජයග්‍රහණය රැගෙන ගියා.
ඉන්දියාව මේ දක්වා අවසාන මහා තරග 04 ක ක්‍රීඩා කර ඇති අතර, ඉන් අවස්ථා දෙකක දී ශූරතාව දිනා ගත්තා.
ඒ, 1983 දී බටහිර ඉන්දීය කොදෙව් කණ්ඩායම සහ 2011 දී ශ්‍රී ලංකාව පරාජයට පත් කරමිනුයි.
2003 සහ මෙවර යන අවස්ථා 02 දීම ඉන්දියාව අනුශූරතාවයට හිමිකම් කීවේ ඔස්ට්‍රේලියාව හමුවේ පරාජයට පත් වෙමිනුයි.
මෙවර ලෝක ශූරතාව දිනාගත් ඔස්ට්‍රේලියා කණ්ඩායමට අමෙරිකානු ඩොලර් මිලියන 04 ක් පිරිනැමුණු අතර, අනුශූර ඉන්දියාවට ලැබුණු මුදල අමෙරිකානු ඩොලර් මිලියන 02 ක්.
