පසුගිය සතියේදී රැඳවුම් භාරයෙන් නිදහස් කරනු ලැබූ ඇතැම් අනවසර සංක්‍රමණිකයන් මුදා හැර ඇත්තේ කිසිදු වලංගු වීසා බලපත්‍රයක් නොමැතිව බවට අනාවරණය වී තිබෙනවා.
ඔවුන්ගෙන් ඇතැමුන්ට නිකුත් කර ඇති ලිපිවල සඳහන් වනුයේ තාවකාලික අවසරයක් මත මුදා හරින බව මිස වලංගු වීසා අනුමැතියක් නොවන බවයි මාධ්‍ය ආයතනයක් විසින් සිදුකර ඇති ගවේෂණාත්මක හෙළිදරව්වක දැක්වෙන්නේ.
ඒ අනුව මහාධිකරණ තීන්දුව මත මෙලෙස නිදහස් කෙරුණු පිරිසට bridging වීසා බලපත් නිකුත් කල බවට විදේශ ඇමතිනී පෙනී වොංග් ඇතුලු රජයේ අමාත්‍යවරුන් සිදුකල ප්‍රකාශ අසත්‍ය බවටද චෝදනා එල්ල වනවා.
මෙලෙස නිදහස ලබා ඇති 83 දෙනා අතර ළමා අපචාර සහ විවිධ අපරාධ සම්බන්ධයෙන් චෝදනා ලැබූවන්ද වන බව රජය විසින් දැනටමත් පිළිගෙන තිබෙනවා.
ඔවුන් පිළිබඳ කිසිදු බියක් තබාගත යුතු නොමැති බවත් දේශ සීමා ආරක්ෂණ බලකාය සහ ෆෙඩරල් පොලිසිය විසින් නිරතුරුවම අවධානයෙන් පසුවන බවත් සංක්‍රමණ අමාත්‍ය ඇන්ඩෲ ගයිල්ස් පවසා තිබුණා.
කෙසේවෙතත් කිසිදු වීසා බලපත්‍රයක් හෝ වීසා කොන්දේසියක් නොමැතිව ලිපියක් පමණක් නිකුත් කර මුදාහැර තිබීම බරපතල ගැටලුවක් බවටයි පාර්ශව ගණනාවක් චෝදනා කරන්නේ.
