ගුවන් ගාස්තු ඉහළ දැමීමට ඔස්ට්‍රේලියාවේ ජාතික ගුවන් සේවය වන ක්වන්ටාස් සහ ඊට අනුබද්ධ අඩු පිරිවැය ගුවන් සේවය වන ජෙට් ස්ටාර් තීරණය කර තිබෙනවා.
ඒ අනුව ලබන 27 වනදා සිට බලපැවැත්වෙන පරිදි අභ්‍යන්තර සහ ජාත්‍යන්තර ගුවන් ගමන් ගාස්තු සියයට 03 ත් 3.5 ත් අතර අගයකින් ඉහළ දැමීමට නියමිතයි.
මැද පෙරදිග පවතින වාතාවරණය හමුවේ ලෝක වෙළඳපොළේ ඉන්ධන මිළ ඉහළයාම – ඔස්ට්‍රේලියානු ඩොලරයේ පහළයාම ඇතුලු සාධක රැසක් මීට බලපා ඇති බවයි ක්වන්ටාස් සමූහය නිවේදනය කරන්නේ.
කෙසේවෙතත් මෙම ගාස්තු වැඩි කරන කාලසීමාව සම්බන්ධයෙන් ගුවන් ප්‍රවේශපත්‍ර ආයතන සහ සංචාරක නියෝජිතයන් අප්‍රසාදය පළකර තිබෙනවා.
නත්තල් සමයට සමගාමීව ඉදිරියේදී විශාල පිරිසක් නිවාඩු ගත කිරීමට යාමට සූදානමින් පසුවීම හමුවේ මෙම ගාස්තු වැඩි කිරීම අසාධාරණ බවයි ඔවුන් අවධාරණය කරන්නේ.
