නිවු සවුත් වේල්ස් හි OPAL කාඩ්පත් ගාස්තු අද සිට ඉහළ දමා තිබෙනවා.
ඒ අනුව සියයට 3.7 කින් ගාස්තු වැඩි වන අතර සතියක ගාස්තුව ඩොලර් එකකින් පමණ ඉහළ යනු ඇති.
දැනට කාර්ය බහුල නොවන වේලාවන් හිදී පොදු ප්‍රවාහන සේවා භාවිත කරන මගීන්ට ලබාදී ඇති සියයට 30 ක ගාස්තු සහනය සිකුරාදා දිනවලදීත් ලබාදීමට නියමිතයි.
මෙතෙක් එම සහනය හිමිවූයේ සති අන්තයේ සහ පොදු නිවාඩු දිනවල කාර්ය බහුල වේලාවන් ලෙස සැළකුණු පෙරවරු 06.30 ත් පෙරවරු 10.30 ත් සහ පස්වරු 03 ත් රාත්‍රී 07 ත් අතර කාලයෙන් බැහැර වේලාවන් හිදීයි.
සතියක් තුළදී ගමන්වාර 08 ක් සම්පූර්ණ කල මගීන්ට ලබාදී තිබූ ගාස්තුවෙන් අඩක් අය කිරීමේ සහනය ද අද සිට නතර වනු ඇති.
OPAL කාඩ්පත් හරහා පොදු ප්‍රවාහනය භාවිත කරන මගීන්ගෙන් සියයට 90 කට ආසන්න ප්‍රමාණයකට අදාල සහනය හිමිනොවන බවට තහවුරු කරගැනීමත් සමගයි එය ඉවත් කිරීමට තීරණය වී ඇත්තේ.
මේ අතර OPAL කාඩ්පත භාවිතයෙන් ගුවන් තොටුපළ දක්වා යාමට පුද්ගලික ප්‍රවාහන සමාගමක් විසින් ක්‍රියාත්මක කර ඇති සේවාව වැඩිහිටි කාඩ්පත් හිමියන් සඳහා ඩොලර් 16.68 ක් ද ළමා කාඩ්පත් හිමියන් සඳහා ඩොලර් 14.92 දක්වා ඉහළ යනු ඇති.
